विराटनगर महानगरद्वारा बजेट पुस्तिका सार्वजनिक 

विराटनगर । विराटनगर महानगरपालिकाले आर्थिक वर्ष २०८३ /८४ को स्वीकृत योजना तथा कार्यक्रमसहितको बजेट पुस्तिका सार्वजनिक गरेको छ । बजेट पुस्तिका सार्वजनिक गरेसँगै महानगरले विकास आयोजना, वित्तीय व्यवस्थापन र सेवा प्रवाहलाई निर्धारित कार्य तालिका अनुसार अघि बढाउने प्रक्रिया औपचारिक रूपमा सुरु गरेको हो ।

महानगर परिसरमा आयोजित एक कार्यक्रमका बीच कार्यवाहक नगर प्रमुख मधुबाबु तिवारी र वडा नम्बर ११ का अध्यक्ष तीर्थेन्द्र नेउपानेले संयुक्त रूपमा बजेट पुस्तिकाको विमोचन गरे ।

Advertisement

कार्यक्रमलाई सम्बोधन गर्दै कार्यवाहक नगर प्रमुख तिवारीले समयमै बजेट पुस्तिका प्रकाशन हुनुलाई सुशासन, पारदर्शिता र उत्तरदायी वित्तीय व्यवस्थापनको महत्त्वपूर्ण उपलब्धिका रूपमा व्याख्या गरे । उनले समयमै बजेट पुस्तिका आउँदा स्वीकृत योजना तथा कार्यक्रम कार्यान्वयनलाई थप व्यवस्थित, प्रभावकारी र नतिजामुखी बनाउन ठुलो सहयोग पुग्ने विश्वास व्यक्त गरे । बजेट तयारीदेखि प्रकाशनसम्म अहोरात्र खटिने कर्मचारी तथा सरोकारवालाहरूलाई उनले धन्यवाद समेत दिए ।

यस्तै, महानगरका प्रमुख प्रशासकीय अधिकृत विजयकुमार शर्माले बजेट पुस्तिका सार्वजनिक भएसँगै चालु आर्थिक वर्षको बजेट कार्यान्वयनको बाटो खुलेको जानकारी दिए । उनका अनुसार नगर प्रमुखबाट खर्च गर्ने अख्तियारी प्राप्त भइसकेको छ भने महानगरका सबै १९ वटै वडाका सचिवहरूलाई आवश्यक निर्देशन दिइसकिएको छ ।

यस वर्षको बजेट पुस्तिकामा केवल आय–व्यय र कार्यक्रमको सूची मात्र नभई महानगरको संस्थागत परिचय, विकास यात्रा, प्राथमिकता, नीति तथा दीर्घकालीन विकास दृष्टिलाई समेत समावेश गरिएको अधिकृत शर्माले बताए । यसले नागरिक, जनप्रतिनिधि तथा अन्य सरोकारवालालाई महानगरको समग्र कार्यदिशाबारे स्पष्ट पार्ने अपेक्षा गरिएको छ ।

त्यस्तै, वडा नम्बर ११ का अध्यक्ष तीर्थेन्द्र नेउपानेले विगतका वर्षहरूको तुलनामा यस पटक समयमै बजेट पुस्तिका सार्वजनिक हुनु सकारात्मक पक्ष भएको बताए । यसले विकास निर्माणका योजनाहरूलाई समयमै अघि बढाउन र बजेट कार्यान्वयनलाई थप प्रभावकारी बनाउन मद्दत पुग्ने उनको भनाइ थियो ।

बजेट पुस्तिका सार्वजनिक भएसँगै अब महानगरका विभिन्न विकास निर्माणका कामहरूले गति लिने र सेवा प्रवाह थप चुस्त हुने महानगरले जनाएको छ ।