कोशी प्रदेशः अध्यक्षको निर्देशनपछि मुख्यमन्त्रीले सरकारको गाँठो फुकाउने दाबी

विराटनगर । नेकपा (एमाले) का केन्द्रीय सचिव एवं कोशी प्रदेश इञ्चार्ज शेरधन राईले पार्टी अध्यक्षको निर्देशन बमोजिम मुख्यमन्त्रीले प्रदेश सरकार सञ्चालन र नेतृत्व सम्बन्धी गाँठो फुकाउने बताएका छन् ।

सामाजिक सञ्जालमार्फत आफ्नो धारणा सार्वजनिक गर्दै नेता राईले गत साउन ९ गते नेकपा एमाले र नेपाली कम्युनिष्ट पार्टीबीच भएको तीनबुँदे सहमति कार्यान्वयन गर्नु दुवै पार्टीको अनिवार्य कर्तव्य भएको उल्लेख गरे । सहमति कार्यान्वयनका क्रममा केही आन्तरिक गाँठो परेको स्वीकार गर्दै उनले मुख्यमन्त्रीले पार्टी अध्यक्षलाई भेटेर सोही निर्देशन अनुसार समस्या समाधान गर्ने जानकारी दिए ।

Advertisement

एमाले अध्यक्षले प्रदेश इन्चार्ज, प्रदेश अध्यक्ष र सचिवलाई गुन्डु बोलाएको भन्ने खबर गलत भएको स्पष्ट पार्दै राईले अन्य कामले काठमाडौँ जाँदा भेटघाट भएको बताए ।

मुख्यमन्त्री फेर्ने विषय प्रदेश इन्चार्जको व्यक्तिगत चाहना भएको र काठमाडौँ नगएर हस्ताक्षर अभियान चलाएको भन्ने हल्लाको उनले खण्डन गरे । यस्ता भ्रामक, कपोलकल्पित र गैरजिम्मेवार अभिव्यक्तिको भर्त्सना गर्दै उनले कुनै पनि अफवाहको भ्रममा नपर्न आग्रह गरे ।

आफू संस्थापक मुख्यमन्त्री छँदा पार्टीको निर्देशन पाउने बित्तिकै तत्कालै अर्का नेतालाई हाँसीखुसी पद हस्तान्तरण गरेको स्मरण गराउँदै राईले आफू सधैँ पार्टीको नीति, विधि र अनुशासनमा प्रतिबद्ध रहेको बताए । पार्टीको निर्णय र निर्देशनलाई अक्षरशः कार्यान्वयन गर्न उनले सम्पूर्ण पार्टी पंक्तिलाई आह्वान समेत गरे ।