विराटनगर आउँदैछन् अभिषेक गिरी, पक्राउ गर्ने प्रहरीको तयारी

विराटनगर । आपराधिक पृष्ठभूमिका अभिषेक गिरी विराटनगर आउने भएपछि प्रहरीले पक्राउको तयारी गरेको छ । उनी बुद्ध एयरको जहाजबाट अहिले साँझ विराटनगर आउँदैछन् ।

विराटनगर विमानस्थल ओर्लनसाथ पक्राउको तयारी गरिएको छ । स्रोतका अनुसार उनलाई पक्राउ गर्न प्रहरी टोली विराटनगर विमानस्थलमा परिचालन गरिएको छ । आपराधिक लाभको आरोपमा पक्राउ गरेर उनीमाथि अनुसन्धान अघि बढाउने तयारी रहेको मोरङ प्रहरी प्रमुख एसपी कवित कटवालले बताए ।

उनका अनुसार गिरीविरुद्ध यसअघि नै अदालतबाट पक्राउ अनुमति लिइसकिएको छ । गुन्डागर्दी पृष्ठभूमिका गिरीलाई काठमाडौं जिल्ला अदालतले केही दिनअघि धरौटीबापत ५ लाख रूपैयाँ लिएर छाड्न आदेश दिएको थियो । धरौटी बुझाएर छुटे पनि मोरङ प्रहरीले पक्राउ गर्ने बुझेपछि उनले धरौटीबापतको रकम बुझाएका थिएनन् ।

धरौटी नबुझाएपछि कारागार चलान गरिएको थियो । अहिले धरौटी बुझाएर छुटेका उनी विराटनगर आउँदैछन् । विराटनगर महानगरपालिका–८ मधुमाराका ४८ वर्षीय गिरीविरुद्ध निर्माण व्यवसायी सुभाष श्रेष्ठले रकम असुल गरेको भनेर किटानी जाहेरी दिएका थिए ।

उक्त जाहेरीका आधारमा ठगी तथा आपराधिक विश्वासघात गरेको कसुरमा नेपाल प्रहरीको केन्द्रीय अनुसन्धान ब्यूरो (सीआईबी)ले गिरीलाई गत असार २३ गते विराटनगरबाट पक्राउ गरेको थियो । सीआईबीले गिरीविरुद्ध २१ करोड ३२ लाख ७६ हजार ५ रुपैयाँ ठगी गरेको भन्दै उक्त रकम बिगो दाबीसहित मुद्दा अदालत लैजानुपर्ने रायसहितको प्रतिवेदन सरकारी वकिल कार्यालयमा बुझाएको थियो ।

सीआईबीकै रायका आधारमा जिल्ला सरकारी वकिल कार्यालय काठमाडौंले गिरीविरुद्ध साउन १४ गते काठमाडौं जिल्ला अदालतमा मुद्दा दर्ता गराएको थियो । सोही मुद्दामा काठमाडौं जिल्ला अदालतका न्यायाधीश नवराज दुलालको इजलासले गिरीलाई पाँच लाख रुपैया धरौटीमा छाड्न आदेश दिएको थियो ।

तर, आदेशअनुसारको रकम नतिरेपछि गिरीलाई डिल्लीबजार कारागार पठाइएको थियो । श्रेष्ठले पाएको ठेक्का आरसी सप्लायर्स एन्ड कन्स्ट्रक्सन प्रालिमार्फत सम्पन्न गरिदिने भन्दै गिरीले ठगी गरेको प्रहरीको अनुसन्धानले देखाएको छ ।

अब गिरीविरुद्ध मोरङ प्रहरीले आपराधिक लाभको कसुरमा अनुसन्धान अघि बढाउने छ । मोरङ कारागारका कैदी बन्दीहरुबाट असुली गरेको आरोपमा मोरङ प्रहरीले असार १३ गते गिरीलाई घरबाटै पक्राउ गरेको थियो ।

उक्त घटनामा अदालतबाट हाजिर जमानीमा छुटेका उनीमाथि सीआईबीले अनुसन्धान गरेको हो । गिरी यसअघि पनि अपहरण तथा शरीर बन्धक मुद्दामा ९ वर्ष जेल बसेर २०७९ चैत ५ गते छुटेका थिए ।