बाढी प्रभावितको उद्धारमा जुट्न कांग्रेस र एमालेको आग्रह

काठमाडौं । भोटेकोशी नदीमा आएको बाढीबाट प्रभावितको उद्धार, राहत तथा पुनर्स्थापनामा तत्काल जुट्न नेपाली कांग्रेस र नेकपा (एमाले)ले सरकार तथा आफ्ना पार्टीपङ्क्तिलाई आग्रह गरेका छन् ।

नेपाली कांग्रेसको आकस्मिक केन्द्रीय समिति बैठकले भोटेकोशी बाढीमा बेपत्ता भएकाहरूको हरसम्भव खोजी गर्न, जोखिममा रहेका नेपाली नागरिक तथा विदेशी पर्यटकको शीघ्र उद्धार तथा स्थानान्तरण गर्न र घाइतेको प्रभावकारी उपचार गर्न सरकारसँग आग्रह गरेको छ । कांग्रेसले विपद्को अवस्थामा सरकार, प्रतिपक्षी दल, संघ–संस्था, निजी क्षेत्र र नागरिक समुदायलाई एकजुट भएर उद्धार तथा राहतमा जुट्न अपिल गरेको छ ।

Advertisement

महामन्त्री प्रदीप पौडेलले पार्टीको सरकारका हरेक प्रयासमा पूर्ण साथ र सहयोग रहने बताउँदै नेता–कार्यकर्तालाई भ्रामक सूचना, मिथ्या र अफवाहको पछि नलाग्न तथा आरोप–प्रत्यारोप नगरी उद्धार, राहत र व्यवस्थापनमा केन्द्रित हुन आग्रह गरेका छन् । कांग्रेसले बाढी प्रभावित रसुवा, नुवाकोट, धादिङ, गोरखा, तनहुँ, चितवन र नवलपुरलाई समेटेर विपद् व्यवस्थापन समन्वय तथा सहजीकरण समिति गठन गरेको छ ।

केन्द्रीय सदस्य एवं रसुवाबाट निर्वाचित प्रतिनिधिसभा सदस्य मोहन आचार्यको संयोजकत्वमा गठित समितिको सदस्य सचिवमा पार्टीको विपद् व्यवस्थापन उपसमितिका संयोजक मानबहादुर थापा रहेका छन् । समितिअन्तर्गत केन्द्रीय कार्यालयमा सूचना तथा समन्वय डेस्क राखिने र कांग्रेसका तर्फबाट हुने सबै प्रकारका सहयोग समितिमार्फत समन्वय गरिने जनाइएको छ । कांग्रेसले पार्टीको तर्फबाट राहत कोषमा एकमुष्ट रकम जम्मा गर्ने निर्णय गरे पनि रकम भने खुलाएको छैन ।

यसैगरी, एमालेले पनि भोटेकोशी बाढीमा बेपत्ता भएकाहरूको खोजी तथा उद्धार, जोखिममा रहेकाहरूको स्थानान्तरण र पुनर्स्थापनाका लागि सरकारसँग माग गरेको छ । एमाले अध्यक्ष केपी शर्मा ओलीले सचिवालयको आकस्मिक बैठकपछि जारी गरेको विज्ञप्तिमार्फत घाइतेको तत्काल उपचार गर्न र थप मानवीय क्षति हुन नदिन सरकारको ध्यानाकर्षण गराएका छन् ।

एमालेले मानवीय तथा भौतिक क्षतिको विवरण तत्काल संकलन गरी विपद् व्यवस्थापनका सम्पूर्ण संयन्त्र, साधन–स्रोत र विकल्प परिचालन गर्न तथा तत्कालीन र दीर्घकालीन राहत प्याकेज घोषणा गर्न सरकारसँग माग गरेको छ । बाढी प्रभावितलाई तत्काल उद्धार, घाइतेको निःशुल्क तथा प्रभावकारी उपचार र प्रभावित क्षेत्रमा शीघ्र राहत सामग्री पुर्‍याउन संघ, प्रदेश र स्थानीय सरकार, जनप्रतिनिधि, सुरक्षा निकाय, राजनीतिक दल, नागरिक समाज, सामाजिक संघ–संस्था तथा आमनागरिकबीच एकीकृत समन्वय र सहकार्य आवश्यक रहेको एमालेले जनाएको छ ।

एमालेले आफ्ना नेता, कार्यकर्ता, जनसंगठनका सदस्य तथा जनप्रतिनिधिलाई प्रभावित क्षेत्रमा तत्काल खोजी, उद्धार र राहतमा सक्रिय हुन तथा स्थानीय प्रशासन र सुरक्षा निकायसँग समन्वय गर्न निर्देशन दिएको छ । सरकारले कुनै पनि बहानामा ढिलाइ नगरी उद्धार कार्यलाई तीव्रता दिन र प्रभावित क्षेत्रमा आवश्यक राहत सामग्री तत्काल पुर्‍याउन पनि एमालेले माग गरेको छ ।