बाढी–पहिरो पीडितको उद्धार र राहतमा जुट्न पूर्वराष्ट्रपति भण्डारीको आग्रह

काठमाडौं । पूर्वराष्ट्रपति विद्यादेवी भण्डारीले रसुवालगायत भोटेकोशी नदी आसपासका क्षेत्रमा बाढी तथा पहिरोबाट प्रभावित नागरिकको तत्काल उद्धार, राहत तथा पुनः स्थापनामा जुट्न सम्बन्धित सबै पक्षसँग आग्रह गरेकी छिन् ।

प्राकृतिक विपद्का कारण जनधनको ठुलो क्षति भएकोप्रति दुःख व्यक्त गर्दै पूर्वराष्ट्रपति भण्डारीले विपद्मा परेका नागरिकको ज्यान जोगाउनु पहिलो प्राथमिकता हुनुपर्नेमा जोड दिएकी छिन् । उनले सरकार, सुरक्षा निकाय, स्थानीय तह, राजनीतिक दल, सामाजिक संघसंस्था तथा आम नागरिकलाई उद्धार कार्यमा सक्रियताका साथ लाग्न अपिल गरेकी छिन् ।

Advertisement

विज्ञप्ति जारी गर्दै उनले प्रभावित क्षेत्रमा खाद्यान्न, स्वास्थ्य सेवा र अस्थायी आवासजस्ता अत्यावश्यक राहत सामग्री तत्काल पुर्‍याउन ध्यानाकर्षण गराएकी छिन् । साथै, थप जोखिममा रहेका नागरिकलाई सुरक्षित स्थानमा स्थानान्तरण गर्न समेत उनले आग्रह गरेकी छिन् ।

विपद्को यस कठिन घडीमा मानवीय सेवाका लागि सबै पक्ष एकजुट हुनुपर्ने भन्दै पूर्वराष्ट्रपति भण्डारीले बेपत्ता भएका नागरिकको खोजी तथा उद्धार कार्यलाई थप प्रभावकारी बनाउन निकायहरूबिच समन्वय हुनुपर्ने बताएकी छिन् । उनले विपद्मा परेर ज्यान गुमाउनेहरूप्रति श्रद्धाञ्जली अर्पण गर्दै शोक सन्तप्त परिवारजनमा गहिरो समवेदना समेत व्यक्त गरेकी छिन् ।