बाढीपीडितलाई डब्लुएचओको स्वास्थ्य सामग्री

काठमाडौं । विश्व स्वास्थ्य संगठन (डब्लुएचओ)ले भोटेकोशी बाढी प्रभावितका लागि १ लाख ५० हजार अमेरिकी डलर बराबरको आपत्कालीन स्वास्थ्य सामग्री सहयोग गरेको छ ।

दक्षिणपूर्वी एसिया क्षेत्रीय स्वास्थ्य आपत्कालीन कोषमार्फत उपलब्ध गराइएको सामग्रीबाट करिब १० हजार जनालाई तीन महिनासम्म आवश्यक स्वास्थ्य सेवा प्रदान गर्न सकिने डब्लुएचओले जनाएको छ । प्रभावितका लागि आवश्यक पालसमेत उपलब्ध गराइएको छ ।

Advertisement

भदौ १० गते बाढी आएपछि केही घण्टामै प्रभावित क्षेत्रमा अत्यावश्यक स्वास्थ्य सामग्री पठाइएको डब्लुएचओ दक्षिणपूर्वी एसिया क्षेत्रीय कार्यालयले जनाएको छ । सामग्रीमा सर्जिकल मास्क, पञ्जा, ह्यान्ड स्यानिटाइजरलगायत स्वास्थ्य सेवामा आवश्यक सामग्री छन् ।

डब्लुएचओका अनुसार बाढीपछि चोटपटक, झाडापखाला, श्वासप्रश्वाससम्बन्धी समस्या, पानी तथा खाद्यजन्य रोग र वाहकजन्य रोगको जोखिम बढ्न सक्छ । त्यसैले प्रभावित क्षेत्रमा तत्काल स्वास्थ्य सेवा र आवश्यक सावधानी अपनाउनुपर्नेमा उसले जोड दिएको छ ।

डब्लुएचओ दक्षिणपूर्वी एसिया क्षेत्रीय कार्यालयका कार्यवाहक प्रमुख डा. निलेश बुद्धले नेपालमा आपत्कालीन प्रतिकार्य तथा पुनःस्थापनाका प्रयासमा निरन्तर सहयोग गर्ने प्रतिबद्धता जनाएका छन् ।