कांग्रेसलाई एकढिक्का बनाउन डा. शेखर नेताहरूसँग छलफलमा  

काठमाडौं । नेपाली कांग्रेसका नेता डा. शेखर कोइरालाले पार्टीभित्रको आन्तरिक विवाद सुल्झाउन र संगठनलाई एकढिक्का बनाउन सक्रियता बढाउँदै छलफल थालेका छन् ।

डा. कोइरालाले मंगलबार (आज) विशालनगरस्थित आफ्नो सम्पर्क कार्यालयमा पार्टीका विभिन्न तहका प्रभावशाली नेताहरूसँग सामूहिक छलफल गरेका छन् । छलफलमा पार्टीको वर्तमान अवस्था, आन्तरिक समस्या र आगामी कार्यदिशाका बारेमा गम्भीर समीक्षा गरिएको बताइएको छ । भेलामा नेताहरु धनराज गुरुङ, बद्री पाण्डे र जीवन परियार, बलबहादुर केसी, सुजता कोइराला, डा. मिनेन्द्र रिजाल र दिलेन्द्रप्रसाद बडू लगायतको उपस्थिति थियो ।

Advertisement

त्यसैगरी छलफलमा शंकर भण्डारी, रामहरि खतिवडा, सरिता प्रसाईं, किरण पौडेल, पदमनारायण चौधरी, नैनसिंह महर, किरण यादव, रङ्गमती शाही, गणेश लामा, अम्बिका बस्नेत, डा. गोविन्दराज पोख्रेल, विष्णु सापकोटा र रञ्जित कर्ण लगायतका नेताहरू सहभागी भएका थिए । सहभागी नेताहरूले पार्टीलाई विधानसम्मत चलाउनुपर्ने र भ्रातृ संस्थाहरूको विवाद छिटो टुङ्ग्याएर संगठनलाई गतिशील बनाउनुपर्नेमा जोड दिएका थिए ।

पछिल्लो समय डा. कोइराला पार्टी एकताका लागि शीर्ष नेताहरूसँग निरन्तर संवादमा छन् । यसअघि उनले भदौ १४ गते डा.  शशांक कोइरालासँग र भदौ १५ गते पूर्वसभापति शेरबहादुर देउवालाई भेटेर पार्टीभित्रका समस्या समाधानका विषयमा छलफल गरेका थिए ।

पार्टीभित्रको बढ्दो ध्रुवीकरण र असन्तुष्टिलाई सम्बोधन गर्दै एकीकृत कांग्रेस बनाउने डा. कोइरालाको यो सक्रियतालाई राजनीतिक वृत्तमा महत्त्वका साथ हेरिएको छ ।