विराटनगरमा ऐतिहासिक राधाकृष्ण रथयात्रा जारी

विराटनगर । विराटनगरमा ५९औँ संस्करणको ऐतिहासिक राधाकृष्ण रथयात्रा जारी छ । शनिबार दिउँसो करिब ३ः३० बजे राधाकृष्ण मन्दिरबाट रथयात्रा सुरु भएको थियो ।

कोशी प्रदेशका मुख्यमन्त्री हिक्मतकुमार कार्कीले विधिवत् पूजाआजा गरी रथयात्राको उद्घाटन गरेपछि भक्तजनले रथ तान्न सुरु गरेका थिए । रथयात्रामा विराटनगरसहित नेपालका विभिन्न स्थान तथा भारतका सीमावर्ती क्षेत्रबाट आएका हजारौँ भक्तजन सहभागी भएका छन् ।

Advertisement

रथयात्राको मुख्य मार्ग तथा विराटनगरका विभिन्न स्थानमा भक्तजनको बाक्लो भिड लागेको छ । रथयात्राको सुरुवातमा विभिन्न क्षेत्रका व्यक्तित्व, जनप्रतिनिधि तथा सुरक्षा अधिकारीहरूको समेत सहभागिता रहेको थियो । ठूलो संख्यामा भक्तजनको सहभागिता हुने भएकाले सुरक्षा व्यवस्था कडा पारिएको छ ।

रथयात्रा राधाकृष्ण मन्दिरबाट तीनपैनी चोक, गोल्छा चोक, मेनरोड, ट्राफिक चोक हुँदै रोडशेष चोक पुगेको छ । यो समाचार तयार पार्दासम्म रथयात्रा रोडशेष चोकबाट उत्तरतर्फ लागेको छ । अब महेन्द्र चोक हुँदै कोशी राजमार्गतर्फ अघि बढेर बरगाछी र दुर्गा चोक हुँदै पुनः राधाकृष्ण मन्दिरमा पुगेर रथयात्रा समापन हुनेछ ।

करिब आठ किलोमिटर दूरी तय गर्ने रथयात्राका लागि मार्गमा ४४ स्थानमा विश्रामको व्यवस्था गरिएको छ । रथयात्रा राधाकृष्ण मन्दिरमा पुगेर राति करिब ९ बजे समापन हुने अनुमान गरिएको छ ।

विसं १९८८ मा राधाकृष्ण मन्दिर स्थापना भएपछि खट यात्राबाट सुरु भएको परम्परा विसं २०२५ देखि भव्य रथयात्राका रूपमा विस्तार भएको हो । खट यात्रासमेत गणना गर्दा यस वर्ष ९५औँ यात्रा हुँदैछ भने रथयात्राको भने ५९औँ संस्करण हो ।

विराटनगरमा सुरु भयो ऐतिहासिक राधाकृष्ण रथयात्रा (फोटाहरुसहित)