राप्रपाका महामन्त्री पाठकद्वारा पार्टीका सबै जिम्मेवारीबाट अलग हुने घोषणा

काठमाडौं । राष्ट्रिय प्रजातन्त्र पार्टी (राप्रपा) का महामन्त्री शरदराज पाठकले पार्टीको कार्यशैलीप्रति असन्तुष्टि जनाउँदै पार्टीका सबै जिम्मेवारीबाट अलग हुने घोषणा गरेका छन् ।

पाठकले आज (आइतबार) सामाजिक सञ्जालमार्फत विज्ञप्ति जारी गर्दै महामन्त्रीसहित पार्टीका सबै पद तथा पार्टी सदस्यसमेत नरहने घोषणा गरेका हुन् ।

Advertisement

करिब चार वर्षदेखि महामन्त्रीको जिम्मेवारीमा रहेका पाठकले पार्टीको विचारधारा र व्यवहारबीच ठूलो विरोधाभास रहेको आरोप लगाएका छन् । ‘भ्रष्टाचार गरेर खानु आमाको रगत खाएसरह हो’ भन्ने कठोर नारालाई पार्टीले मूलमन्त्र माने पनि त्यसअनुसारको व्यावहारिक प्रतिबद्धता र पारदर्शिताको अभाव देखिएको उनले बताएका छन् ।

पार्टीको केन्द्रीय नेतृत्व तहमा स्थापनाकालदेखिकै आन्तरिक बेमेल र गुटगत स्वार्थका कारण तिक्तता बढ्दै गएको पनि पाठकको आरोप छ । यस्तो अवस्थाले नयाँ पुस्ताका इमानदार, शिक्षित र सचेत युवालाई पार्टीतर्फ आकर्षित गर्न कठिन भइरहेको उनले बताएका छन् ।

पाठकले आफू र आफूसँगै पार्टीमा जोडिएका नयाँ पुस्ताका नेताहरूले विद्यमान अवस्थामा परिवर्तन ल्याउन सक्ने सम्भावना नदेखेको उल्लेख गरेका छन् । यद्यपि, राप्रपाका तल्ला तहमा रहेका नेता तथा कार्यकर्ताको निष्ठा र प्रतिबद्धता भने अतुलनीय र प्रेरणादायी रहेको भन्दै उनले उनीहरूप्रति सम्मान व्यक्त गरेका छन् । पाठक रवीन्द्र मिश्रसँगै राप्रपामा प्रवेश गरेका थिए। मिश्रले भने गत निर्वाचनलगत्तै पार्टी छाडेका थिए ।