झापा र कैलालीमा जेईविरुद्ध खोप अभियान

काठमाडौं । जापानिज इन्सेफ्लाइटिस (जेई) को सङ्क्रमण र मृत्युदर बढेपछि स्वास्थ्य तथा खाद्य स्वच्छता मन्त्रालयले झापा र कैलालीका जोखिमयुक्त क्षेत्रमा जेईविरुद्धको विशेष खोप अभियान सञ्चालन गर्ने भएको छ । मन्त्रालयका अनुसार कैलालीमा असोज १ गतेदेखि र झापामा असोज ५ गतेदेखि खोप अभियान सञ्चालन गरिनेछ । जेई सङ्क्रमणको जोखिमलाई ध्यानमा राख्दै पहिलो चरणमा उच्च जोखिम देखिएका क्षेत्रमा अभियान सञ्चालन गर्न लागिएको हो ।

स्वास्थ्य सेवा विभाग, परिवार कल्याण महाशाखाअन्तर्गत बाल स्वास्थ्य तथा खोप सेवा शाखाका प्रमुख डा. अभियान गौतमका अनुसार पहिलो चरणमा झापाका सबै स्थानीय तहमा तथा कैलालीका धनगढी उपमहानगरपालिका, लम्कीचुहा नगरपालिका र घोडाघोडी नगरपालिकामा खोप अभियान सञ्चालन हुनेछ ।

Advertisement

अभियानअन्तर्गत ३० वर्ष वा सोभन्दा माथिका व्यक्तिलाई जेईविरुद्धको खोप लगाइनेछ । झापामा मात्रै करिब चार लाख ९३ हजार ३१९ जनालाई खोप लगाउने लक्ष्य राखिएको छ । जिल्लामा पछिल्लो समय जेई सङ्क्रमण र मृत्युदर बढेपछि खोप अभियान सञ्चालन गर्न लागिएको हो ।

झापामा हालसम्म १३ जनामा जेई सङ्क्रमण पुष्टि भएकामा चार महिला र दुई पुरुष गरी छ जनाको मृत्यु भएको स्वास्थ्य कार्यालयले जनाएको छ । सङ्क्रमण बढेपछि जिल्लाका सबै १५ स्थानीय तहमा अभियान सञ्चालन गर्ने तयारी गरिएको हो ।

आवश्यक जेई खोप काठमाडौंस्थित केन्द्रीय खोप भण्डारण केन्द्रबाट सम्बन्धित जिल्लामा पठाउने तयारी भइरहेको छ । खोप उपलब्ध भएपछि स्थानीय तह र स्वास्थ्य संस्थामार्फत लक्षित समूहलाई खोप लगाइने स्वास्थ्य मन्त्रालयले जनाएको छ ।

जापानिज इन्सेफ्लाइटिस लामखुट्टेको टोकाइबाट सर्ने भाइरसजन्य रोग हो । सङ्क्रमण गम्भीर अवस्थामा पुगेमा मस्तिष्कमा असर पार्नुका साथै ज्यानसमेत जान सक्ने भएकाले जोखिम क्षेत्रमा खोप अभियानलाई प्राथमिकताका साथ अघि बढाइएको हो ।