विराट टिचिङ हस्पिटलमा राष्ट्रिय स्वास्थ्य शिक्षा सम्मेलन हुँदै 

विराटनगर । विराट टिचिङ हस्पिटलमा स्वास्थ्य शिक्षा प्रणालीमा सुधार, पाठ्यक्रम परिमार्जन तथा दक्षतामा आधारित चिकित्सा शिक्षाको कार्यान्वयनबारे बहस गर्न राष्ट्रिय सम्मेलन आयोजना हुने भएको छ ।

विराट मेडिकल कलेज एन्ड टिचिङ हस्पिटलअन्तर्गतको हेल्थ प्रोफेसन्स एजुकेसन डिपार्टमेन्ट (एचपीईडी) ले स्थापनाको १० औँ वार्षिकोत्सवको अवसरमा  ‘एचपीईडी–कन २०२६’ आयोजना गर्न लागेको हो । बुढीगंगा–२ स्थित विराट मेडिकल कलेज टिचिङ हस्पिटल परिसरमा स्वास्थ्य व्यवसाय शिक्षा क्षेत्रका राष्ट्रिय तथा अन्तर्राष्ट्रिय विज्ञलाई एकै मञ्चमा ल्याउने उद्देश्यसहित असोज १ देखि ३ गतेसम्म सम्मेलन हुन लागेको हो ।

Advertisement

‘स्वास्थ्य व्यवसाय शिक्षा क्षेत्रमा नेतृत्व: नवप्रवर्तन, समावेशिता र प्रभाव’ भन्ने नारासहित आयोजना हुने सम्मेलनमा नेपालको स्वास्थ्य शिक्षा प्रणालीलाई समयसापेक्ष र अन्तर्राष्ट्रिय मापदण्ड अनुकूल बनाउने विषयमा छलफल गरिने आयोजकले जनाएको छ।

सम्मेलनमा मेडिकल डाक्टर, नर्स, एलाइड हेल्थ प्रोफेसनल, फिजियोथेरापिस्ट, जनस्वास्थ्य विज्ञ, स्वास्थ्य शिक्षा क्षेत्रमा संलग्न शिक्षक तथा विद्यार्थी, नीति निर्माता र अन्तर्राष्ट्रिय प्रशिक्षकको सहभागिता रहने छ ।

आयोजक एवं सम्मेलन संयोजक प्रा. डा. हेमसागर रिमालका अनुसार भविष्यमा स्वास्थ्य शिक्षा, तालिम र सीप विकासको स्वरूप कस्तो हुनुपर्ने, विद्यमान पाठ्यक्रममा आवश्यक सुधार कसरी गर्ने तथा नेपालको स्वास्थ्य शिक्षा प्रणालीलाई विश्वव्यापी मापदण्ड अनुकूल कसरी परिमार्जन गर्ने भन्ने विषयमा कार्यपत्र तथा गहन छलफल हुनेछ ।

त्यसैगरी, स्वास्थ्य क्षेत्रमा देखिएका चुनौती सम्बोधन गर्दै गुणस्तरीय र सुरक्षित स्वास्थ्य सेवा प्रवाहका लागि नयाँ प्रविधिको प्रयोग तथा दक्षतामा आधारित चिकित्सा शिक्षाको कार्यान्वयनबारे पनि सम्मेलनमा बहस गरिने छ ।

सम्मेलनमा नेपाल, भारत, श्रीलंका र बेलायतसहितका देशबाट ३ सयभन्दा बढी स्वास्थ्य शिक्षाविद् तथा स्वास्थ्य क्षेत्रका विज्ञ सहभागी हुने आयोजकले जनाएको छ । तीन दिनसम्म चल्ने सम्मेलनमा ३० वटा कार्यपत्र प्रस्तुत गरिनेछ, जसमध्ये चारवटा कार्यपत्र विदेशी विज्ञले प्रस्तुत गर्ने छन् ।

नेपालका चिकित्सा तथा स्वास्थ्य शिक्षा नीतिका विज्ञहरूले समेत विभिन्न विषयमा कार्यपत्र प्रस्तुत गर्ने छन् ।

सन् २०१६ मा स्थापना भएको हेल्थ प्रोफेसन्स एजुकेसन डिपार्टमेन्टले स्वास्थ्य शिक्षा तथा क्षमता विकाससँग सम्बन्धित विभिन्न कार्यक्रम सञ्चालन गर्दै आएको छ । स्थापनाको एक दशक पूरा भएको अवसरमा आयोजना हुन लागेको सम्मेलनबाट नेपालको स्वास्थ्य व्यवसाय शिक्षा र स्वास्थ्य सेवा क्षेत्रमा सुधारका लागि आवश्यक नीति तथा अभ्यासबारे नयाँ दिशानिर्देश तय गर्ने अपेक्षा आयोजकले गरेको छ ।