झापामा जेईविरुद्ध पाँच लाख ७० हजार डोज खोप लगाइँदै

झापा । झापामा जापानिज इन्सेफ्लाइटिस (जेई) विरुद्ध पाँच लाखभन्दा बढी नागरिकलाई खोप लगाइने भएको छ । स्वास्थ्य कार्यालय झापाले असोज ५ देखि १५ गतेसम्म जिल्लाका १५ वटै स्थानीय तहमा ३० वर्षमाथिका नागरिकलाई लक्षित गरी खोप अभियान सञ्चालन गर्न लागेको हो ।

स्वास्थ्य कार्यालयका प्रमुख बृजकुमार दासका अनुसार अभियानका लागि पाँच लाख ७० हजार डोज खोप जिल्लामा आइसकेको छ । स्थानीय तहसँगको समन्वय, स्वास्थ्यकर्मीको अभिमुखीकरण र खोप केन्द्र व्यवस्थापनलगायतका तयारी पूरा भएको उनले बताए । जिल्लाका १३१ वडामा ९०० खोप केन्द्र स्थापना गरी खोप लगाइनेछ । अभियानमा करिब ५०० स्वास्थ्यकर्मी, ६११ महिला स्वास्थ्य स्वयंसेविका र तीन हजारभन्दा बढी स्वयंसेवक परिचालन हुनेछन् ।

Advertisement

झापामा जेई सङ्क्रमण र मृत्युदर बढ्दै गएपछि उच्च सतर्कतासहित अभियान सञ्चालन गर्न लागिएको कार्यालयले जनाएको छ। देशभरमै झापामा जेई सङ्क्रमण उच्च रहेकाले जिल्लाबाटै अभियान सुरु गर्न लागिएको दासले बताए । झापामा हालसम्म १३ जनामा जेई सङ्क्रमण पुष्टि भएकोमा सात जनाको मृत्यु भइसकेको छ । सङ्क्रमितमध्ये ५० वर्षमाथिका छ जना र आठ वर्षीय एक बालक छन्। मृत्यु भएका कसैले पनि जेईविरुद्धको खोप नलगाएको दासले बताए ।

उनका अनुसार जेईविरुद्धको खोप सुरक्षित रहेको र खोप लगाएपछि सामान्य असर देखिए पनि गम्भीर स्वास्थ्य समस्या नहुने बताए। लक्षित समूहका नागरिकलाई अभियानमा सहभागी भएर खोप लगाउन उनले आग्रह गरे । गर्भवती तथा तत्काल खोप लगाउन नमिल्ने अवस्थाका बिरामीबाहेक लक्षित समूहका सबै नागरिकलाई खोप लगाउन सकिने स्वास्थ्य कार्यालयले जनाएको छ ।