चालेन्द्रसहित निकट व्यक्तिका घरमा सम्पत्ति शुद्धीकरण विभागको टोली

काठमाडौं । पूर्वप्रधान न्यायाधीश चोलेन्द्र शमशेर जबरासहित उनीसँग निकट सम्बन्ध रहेका व्यक्तिका घरमा सम्पत्ति शुद्धीकरण अनुसन्धान विभागले बुधबार खानतलासी गरेको छ ।

विभागको टोलीले जबराको घरसँगै उनका केही नातेदार तथा निकट व्यक्तिको निवासमा पनि एकैपटक छापा हानेको हो । विभाग स्रोतका अनुसार खोजतलासीका क्रममा विभिन्न कागजातसमेत नियन्त्रणमा लिइएको छ ।

जबरासहित उनीसँग सम्बन्धित व्यक्तिको सम्पत्ति र आर्थिक कारोबारबारे अनुसन्धानका क्रममा विभागले यो कदम चालेको बताइएको छ । यद्यपि, छानबिनको विस्तृत विषय र नियन्त्रणमा लिइएका कागजातबारे विभागले औपचारिक रूपमा विस्तृत जानकारी दिएको छैन ।

यसअघि केही समयअघि जबरालाई प्रहरीले उनको निवासबाट नियन्त्रणमा लिएको थियो । उनलाई १२ घण्टाभित्रै घरमै पुर्‍याइएको थियो। प्रहरीले भने जबरालाई नियन्त्रणमा नभई सुरक्षा प्रयोजनका लागि निगरानीमा राखिएको दाबी गरेको थियो ।

सरकारका प्रवक्ता सस्मित पोखरेलले समेत जबरालाई अज्ञात समूहबाट धम्की आएको सूचना पाएपछि प्रहरीले सुरक्षा दिएको बताएका थिए । सम्पत्ति शुद्धीकरण विभागको पछिल्लो छापासँगै जबराको सम्पत्ति तथा आर्थिक कारोबारसम्बन्धी विषय पुनः अनुसन्धानको दायरामा आएको छ ।