२२ किलो सुनसहित पक्राउ परेका तीन चिनियाँ नागरिक सार्वजनिक

काठमाडौं । काठमाडौं उपत्यका अपराध अनुसन्धान कार्यालयले करिब २२ किलो सुनसहित पक्राउ परेका तीन जना चिनियाँ नागरिकलाई सार्वजनिक गरेको छ। कार्यालयले शुक्रबार पत्रकार सम्मेलन गरी उनीहरूलाई सार्वजनिक गरेको हो ।

प्रहरीका अनुसार पक्राउ पर्नेमा २७ वर्षीय हान फेइ, ३७ वर्षीय वाङ जियानझेन र ४७ वर्षीय झोउ लोङक्विन छन् । उनीहरूलाई कार्यालयबाट खटिएको प्रहरी टोलीले बिहीबार राति बुढानीलकण्ठस्थित एक घरबाट पक्राउ गरेको थियो ।

प्रहरीले उनीहरूको साथबाट २१ किलो ७५० ग्राम सुन बरामद भएको जनाएको छ। सार्वजनिक गर्ने क्रममा प्रहरीले तयारी अवस्थामा राखिएका ११ वटा टुक्रामा रहेको १० किलो ९९७ ग्राम सुन र प्रशोधन गर्न बाँकी १० किलो ७५२ ग्राम सुनसमेत देखाएको थियो ।

प्रहरीका अनुसार चिनियाँ नागरिकहरूले बुढानीलकण्ठमा घर भाडामा लिएर सुन प्रशोधन गर्ने ठाउँका रूपमा प्रयोग गर्दै आएका थिए । उक्त घरबाट सुन गाल्न प्रयोग गरिने मेसिनसमेत बरामद गरिएको प्रहरीले जनाएको छ ।