ताप्लेजुङमा तीन महिनामै एक करोडभन्दा बढीको खाद्यान्न बिक्री

ताप्लेजुङ । खाद्य व्यवस्था तथा व्यापार कम्पनी लिमिटेडको ताप्लेजुङ शाखाले चालु आर्थिक वर्षको पहिलो तीन महिनामा एक करोड दुई लाख रुपैयाँभन्दा बढीको खाद्यान्न बिक्री गरेको छ ।

शाखाले साउनदेखि असोजसम्म एक करोड दुई लाख ७५० रुपैयाँको खाद्यान्न बिक्री गरेको शाखा प्रमुख प्रकाश तिम्सिनाले बताए । गत आर्थिक वर्ष २०८२/८३ मा कम्पनीले एक करोड छ लाख रुपैयाँको खाद्यान्न बिक्री गरेको थियो ।

तिम्सिनाका अनुसार तीन महिनामा एक हजार १८२ क्विन्टलभन्दा बढी खाद्यान्न बिक्री भएको छ । यस अवधिमा सबैभन्दा बढी जिरा मसिनो चामल बिक्री भएको छ। कार्यालयका अनुसार ५० लाख ६५ हजार २५ रुपैयाँको ५७२ क्विन्टल जिरा मसिनो चामल बिक्री भएको हो ।

त्यस्तै, २० लाख ९० हजार ६२५ रुपैयाँको ३४० क्विन्टल सोना चामल बिक्री भएको कार्यालयले जनाएको छ । ताप्लेजुङमा कम्पनी स्थापना भएको ४८ वर्षपछि चिनी र दाल बिक्री सुरु गरिएको थियो । यस अवधिमा २४८ दशमलव ५ क्विन्टल चिनी बिक्रीबाट २७ लाख ३५ हजार ५०५ रुपैयाँ आम्दानी भएको छ । यस्तै, २१ दशमलव ५ क्विन्टल दाल बिक्रीबाट तीन लाख १३ हजार ५०५ रुपैयाँको कारोबार भएको कार्यालयले जनाएको छ ।

चाडपर्वको समयमा चिनी र दाल विशेष छुटमा बिक्री सुरु गरेपछि उपभोक्ताको चाप बढेको र त्यसले खाद्यान्न बिक्री बढाउन सहयोग पुगेको कार्यालयको भनाइ छ । कम्पनीले चिनी प्रतिकिलोग्राम ११० रुपैयाँ र दाल प्रतिकिलोग्राम १४५ रुपैयाँमा बिक्री गरिरहेको छ ।