साउदीमा आक्रमण : नेपाली नागरिकको सुरक्षा सुनिश्चित गर्न कांग्रेसको माग

काठमाडौं । साउदी अरबको सेवा आयल फिल्डमा भएको ड्रोन आक्रमणका क्रममा खसेको भग्नावशेष लागेर एक नेपाली नागरिकको मृत्यु भएको घटनाप्रति नेपाली कांग्रेसले दुःख व्यक्त गरेको छ । कांग्रेसले विज्ञप्ति जारी गर्दै मृतकप्रति श्रद्धाञ्जली अर्पण गर्दै शोकसन्तप्त परिवारजनप्रति समवेदना व्यक्त गरेको हो ।

कांग्रेसले निर्दोष नागरिकको ज्यान जाने गरी हुने हिंसात्मक घटनाको निन्दा गर्दै नेपाल संलग्न नरहेको द्वन्द्वमा नेपाली नागरिकले ज्यान गुमाउनुपर्ने अवस्था दुःखद र चिन्ताजनक रहेको जनाएको छ । कांग्रेस सभापति गगनकुमार थापाले घटनाप्रति दुःख व्यक्त गर्दै साउदी अरबमा कार्यरत नेपाली नागरिकको सुरक्षाका लागि थप प्रभावकारी पहल गर्न सरकारको ध्यानाकर्षण गराएका छन् ।

उनले सम्भावित जोखिमप्रति उच्च सतर्कता अपनाउन तथा आवश्यक परेमा नेपाली नागरिकको उद्धारको प्रबन्ध गर्न समेत सरकारसँग आग्रह गरेका छन् । कांग्रेसका कार्यवाहक मुख्यसचिव कृष्णप्रसाद दुलालद्वारा जारी विज्ञप्तिमा शोकसन्तप्त परिवारलाई यस दुःखद घडीमा धैर्यधारण गर्ने शक्ति मिलोस् भन्ने कामना समेत गरिएको छ ।