कमलको कहरले विराटनगरको जित खोस्यो, चितवन ८ रनले विजयी

काठमाडौं । अन्तिम तीन ओभरमा खेल आफ्नो पक्षमा पार्ने अवस्थामा पुगेको विराटनगर किंग्सलाई सम्हालिन नदिँदा चितवन राइनोजले नेपाल प्रिमियर लिग (एनपीएल)को तेस्रो संस्करणमा रोमाञ्चक जित निकालेको छ ।

त्रिवि क्रिकेट मैदानमा मंगलबार भएको खेलमा चितवनले विराटनगरलाई ८ रनले पराजित गरेको हो । चितवनले दिएको १५८ रनको लक्ष्य पछ्याएको विराटनगर १९.३ ओभरमा १४९ रनमै समेटियो । विराटनगरलाई जितका लागि अन्तिम १८ बलमा २१ रन आवश्यक थियो । हातमा विकेट पनि बाँकी थिए । तर, कमलसिंह ऐरीले १८औं ओभरमा लगातार दुई विकेट लिएपछि खेलको दिशा बदलियो ।

कमलको कहरले विराटनगरको जित खोसेको हो । कमलले रुपेश सिंह र प्रतिश जिसीलाई लगातार बलमा पभेलियन फर्काए । त्यसपछि दबाबमा परेको विराटनगरले सम्हालिने मौका पाएन । १९औं ओभरमा रिजन ढकालले थप दुई विकेट लिएपछि चितवनको जित निश्चितजस्तै बन्यो ।

चितवनको जितमा कमल सर्वाधिक प्रभावकारी बलर बने । उनले चार ओभरमा २६ रन खर्चेर चार विकेट लिए । रिजन ढकालले दुई विकेट लिए भने रञ्जित कुमार, मौसम ढकाल, टम टेलर र डान मोस्लीले एक–एक विकेट हात पारे ।

विराटनगरका लागि आन्द्रे रसेलले आक्रामक ब्याटिङ गर्दै खेललाई रोमाञ्चक मोडमा पुर्‍याएका थिए । उनले १७ बलमा एक चौका र चार छक्काको मद्दतमा ३३ रन बनाए । एन्जेलो म्याथ्युजसँग मिलेर उनले २४ बलमा ४३ रनको साझेदारी गरेका थिए । म्याथ्युज १४ रनमा आउट भए ।

ओपनर इम्रान शेखले ३९ रन बनाएर विराटनगरको इनिङ्समा सर्वाधिक योगदान दिए । उनले लोकेश बमसँग पहिलो विकेटका लागि ४० रन जोडेका थिए । लोकेशले १४ बलमा २६ रन बनाए । शुभम रञ्जाने १०, बसिर अहमद १३ र चरिथ असलंका ८ रनमा आउट भए । कप्तान सन्दीप लामिछानेले खाता खोल्न सकेनन् ।

त्यसअघि टस हारेर पहिले ब्याटिङ गरेको चितवनले निर्धारित २० ओभरमा तीन विकेट गुमाएर १५७ रन बनाएको थियो । उसका लागि डाविड मलानले अर्धशतकीय इनिङ्स खेल्दै सर्वाधिक ७० रन जोडे । उनले ५१ बलको सामना गरेका थिए ।

मलानले देव खनालसँग पहिलो विकेटका लागि ५८ रनको साझेदारी गरे । देव १५ बलमा १२ रन बनाएर आउट भए । विकेटकिपर ब्याटर अर्जुन साउदले पनि अपेक्षित प्रदर्शन गर्न सकेनन् । उनी नौ बलमा तीन रन बनाएर पभेलियन फर्किए ।

मलान १३औं ओभरमा आन्द्रे रसेलको बलमा आउट भएपछि चितवनको इनिङ्स रवि बोपारा र डान मोस्लीले अघि बढाए । दुवैले तेस्रो विकेटका लागि अविजित ६७ रनको साझेदारी गर्दै टोलीलाई प्रतिस्पर्धात्मक योगफलमा पुर्‍याए । रवि ३२ र डान २९ रनमा अविजित रहे ।

चितवनले बनाएको यही योगफल जोगाउन बलरहरूले अन्तिम ओभरमा उत्कृष्ट प्रदर्शन गरे । विशेषगरी कमलको लगातार दुई विकेट र रिजनको प्रभावकारी बलिङ विराटनगरका लागि भारी पर्‍यो ।