स्वीमिङ च्याम्पियनसिपमा एभरेस्ट स्कुलका विद्यार्थीले जिते ६ पदक

विराटनगर । नेपालगन्जमा सम्पन्न ‘तेस्रो नेपालगन्ज अन्तर्राष्ट्रिय स्वीमिङ च्याम्पियनसिप’ मा विराटनगरको एभरेस्ट  सेकेन्डरी स्कुलका दुई विद्यार्थीले ६ पदक जितेका छन् ।

प्रतियोगितामा कक्षा ७ मा अध्ययनरत पुरव तिम्सिना र आराध्य पाण्डेले उत्कृष्ट प्रदर्शन गर्दै दुई रजत र चार कांस्य पदक जितेका हुन् ।

नेपाल पौडी संघको प्राविधिक सहयोगमा नेपालगन्ज स्वीमिङ क्लबले आयोजना गरेको प्रतियोगितामा पुरवले १०० मिटर र ५० मिटर ब्रेस्टस्ट्रोक दुवै विधामा दोस्रो स्थान हासिल गर्दै दुई रजत पदक जिते । त्यस्तै, आराध्यले १०० मिटर फ्रिस्टाइल, ५० मिटर ब्याकस्ट्रोक, ५० मिटर बटरफ्लाइ र ५० मिटर फ्रिस्टाइलमा तेस्रो स्थान हासिल गर्दै चार कांस्य पदक आफ्नो नाममा पारे ।

प्रतियोगितामा नेपालका सातवटै प्रदेशका साथै भारतको नयाँ दिल्ली र लखनउलगायत स्थानबाट करिब १५० खेलाडी सहभागी भएका थिए । कडा प्रतिस्पर्धाबिच एभरेस्टका विद्यार्थीले हासिल गरेको यो सफलतालाई विद्यालयले गौरवको उपलब्धिका रूपमा लिएको छ ।

विद्यालयका प्रिन्सिपल टीकाराम पुरीले विद्यार्थीको मेहनत, अनुशासन र दृढ संकल्पले विद्यालयलाई गौरवान्वित बनाएको बताए । उनीहरूको सफलताले विद्यालयको खेलकुद पहिचान उँचो बनाउनुका साथै अन्य विद्यार्थीलाई पनि पौडी खेलप्रति आकर्षित र प्रेरित गर्ने विश्वास उनले व्यक्त गरे ।