धनकुटामा ट्रक र दुई मोटरसाइकल ठोक्किँदा एक जनाको मृत्यु, दुई घाइते

धनकुटा । धनकुटामा ट्रक र दुई मोटरसाइकल ठोक्किँदा एक महिलाको मृत्यु भएको छ भने दुई जना घाइते भएका छन् ।

बिहीबार साँझ धनकुटा नगरपालिका-१ सुकेपोखरीस्थित कोशी लोकमार्गमा भएको दुर्घटनामा धनकुटा नगरपालिका-१ निगालेकी करिब ५२ वर्षीया ठोमा देवी ठकुरीको मृत्यु भएको जिल्ला प्रहरी कार्यालय धनकुटाका सूचना अधिकारी प्रहरी नायब उपरीक्षक हेमन्त भण्डारी क्षेत्रीले जानकारी दिए ।

प्रहरीका अनुसार हिलेबाट धनकुटातर्फ आउँदै गरेको प्रदेश १-०२-००२ ख ०४७४ नम्बरको ट्रकलाई सोही दिशाबाट आउँदै गरेको को १० प ९६८ नम्बरको मोटरसाइकलले ओभरटेक गर्ने क्रममा ठक्कर दिएको थियो । त्यसपछि विपरीत दिशाबाट आउँदै गरेको को ३८ प ३०६८ नम्बरको अर्को मोटरसाइकलसमेत दुर्घटनामा परेको थियो ।

दुर्घटनामा को १० प ९६८ नम्बरको मोटरसाइकलमा सवार ठकुरीको घटनास्थलमै मृत्यु भएको हो । उक्त मोटरसाइकलका चालक धनकुटा नगरपालिका-३ निगालेका ५३ वर्षीय गुणराज ठकुरी गम्भीर घाइते भएका छन् । उनलाई उपचारका लागि जिल्ला अस्पताल धनकुटा पठाइएको प्रहरीले जनाएको छ ।

अर्को मोटरसाइकलका चालक मोरङको विराटनगर महानगरपालिका-१ का २० वर्षीय रोशन तामाङ सामान्य घाइते भएका छन् । उनको पनि जिल्ला अस्पताल धनकुटामा उपचार भइरहेको छ ।