कार्की सर्वोच्चमा, रिट रोकियो

काठमाडौं । प्रहरी महानिरीक्षक (आईजीपी)बाट हटाइएपछि सरकारको निर्णयविरुद्ध कानुनी लडाइँमा उत्रिएका दानबहादुर कार्कीले तत्काल न्यायिक प्रक्रियामा प्रवेश पाउन सकेनन् । उनले सर्वोच्च अदालतमा पेस गरेको रिट निवेदन बिहीबार दर्ता नभई अध्ययनका लागि प्रशासनमै रोकिएको छ ।

सरकारले बुधबार कार्कीलाई आईजीपीको जिम्मेवारीबाट हटाएर डा. मनोजकुमार केसीलाई नयाँ प्रहरी प्रमुख नियुक्त गरेपछि कार्की उक्त निर्णय बदरको माग गर्दै सर्वोच्च अदालत पुगेका थिए । तर, सर्वोच्च प्रशासनले निवेदनको अध्ययन आवश्यक रहेको भन्दै तत्काल दर्ता गर्न अस्वीकार गरेको हो ।

कार्कीका तर्फबाट कानुनी प्रक्रिया अघि बढाइरहेका अधिवक्ता टीकाबहादुर कुँवरका अनुसार प्रशासनले रिट अध्ययन गर्न समय लाग्ने जनाएको छ । त्यसैले बिहीबार निवेदन दर्ता हुन नसकेको उनले बताए ।

सरकारको निर्णयसँगै डा. केसीले बुधबारदेखि नै प्रहरी महानिरीक्षकको जिम्मेवारी सम्हालिसकेका छन् । कार्कीको रिट शुक्रबारसम्म दर्ता भए पनि तिहारको बिदाका कारण त्यसको प्रारम्भिक सुनुवाइ भने बिदा सकिएपछि मात्रै हुने देखिएको छ ।