राति १० बजे नै व्यवसाय बन्द गर्नुपर्ने नियमप्रति विराटनगरका व्यवसायी असन्तुष्ट

विराटनगर । रात्रिकालीन व्यवसाय सञ्चालनको समयसीमा बढाउन विराटनगरका होटल, रेस्टुरेन्ट तथा बार सञ्चालकले माग गरेका छन् । प्रशासनले राति १० बजे नै व्यवसाय बन्द गर्नुपर्ने व्यवस्था लागू गरेपछि व्यापार प्रभावित भएको भन्दै उनीहरूले राति १२ बजेसम्म सञ्चालनको अनुमति दिन माग गरेका हुन् ।

व्यवसायीहरूले जिल्ला प्रशासन कार्यालय मोरङले निर्धारण गरेको समयसीमा अव्यावहारिक भएको जनाउँदै विराटनगर महानगरपालिकाकी कार्यवाहक प्रमुख शिल्पा निराला कार्कीलाई ज्ञापनपत्र बुझाएका छन् । प्रशासनको व्यवस्थाअनुसार होटल, रेस्टुरेन्ट, गजल, स्पा, क्लब तथा लाउन्जले राति १० बजेभित्र गेट बन्द गर्नुपर्ने र १०ः३० बजेसम्म ग्राहकलाई बिदा गरिसक्नुपर्ने हुन्छ ।

व्यवसायीहरूले विशेषगरी चाडपर्व र व्यापारिक चहलपहल बढ्ने समयमा यस्तो प्रतिबन्धले व्यवसायमा ठूलो असर पार्ने बताएका छन् । उनीहरूले प्रहरीको कार्यशैलीमाथि पनि प्रश्न उठाएका छन् ।

गत कात्तिक १७ गते राति विराटनगर महानगरपालिका–३ स्थित फिल गुड एण्ड ग्रील प्रालिमा प्रहरीले गरेको हस्तक्षेपलाई व्यवसायीहरूले अनावश्यक धरपकडको संज्ञा दिएका छन् । महानगरपालिका र प्रशासनबीच निश्चित समयसम्म व्यवसाय सञ्चालन गर्न दिने समझदारी रहे पनि प्रहरीले राति ११ः३० बजे बिनासूचना प्रवेश गरी सञ्चालक निर्जलकुमार श्रेष्ठसहित दुई कर्मचारीलाई पक्राउ गरेर रातभर थुनामा राखेको उनीहरूको आरोप छ ।

तोकिएको समयसीमाभन्दा अगाडि नै प्रहरीले हस्तक्षेप गर्ने र व्यवसायीलाई पक्राउ गर्ने गतिविधिले लगानीकर्तामा असुरक्षा बढाएको व्यवसायीहरूको भनाइ छ । साझा पहल समूहका संयोजक वसन्त अधिकारीसहितका व्यवसायीले रात्रिकालीन व्यवसायलाई व्यवस्थित र सुरक्षित रूपमा सञ्चालन गर्ने वातावरण बनाउन महानगरपालिकासँग आग्रह गरेका छन् ।

उनीहरूले व्यवसायीलाई त्रसित बनाउने नभई नियमन र सहजीकरणमार्फत समस्या समाधान गर्नुपर्ने बताएका छन् । ज्ञापनपत्र बुझ्दै कार्यवाहक प्रमुख कार्कीले व्यवसायीका समस्या र मागप्रति ध्यानाकर्षण भएको बताइन् । उनले सम्बन्धित निकायसँग छलफल गरेर उचित निकास खोज्ने प्रतिबद्धता जनाएकी छन् ।