
काठमाडौँ । कोटेश्वरका व्यापारी रामहरि श्रेष्ठको हत्या अभियोगमा सफाइ पाएका गोविन्दबहादुर बटाला ‘जीवित’ विरुद्धको पुनरावलोकन मुद्दाको सुनुवाइ बिहीबार स्थगित भएको छ। महान्यायाधिवक्ता कार्यालयको अनुरोधमा उक्त मुद्दाको सुनुवाइ स्थगित गरिएको हो।
सर्वोच्च अदालतले बटालालाई सफाइ दिएपछि सरकारले महान्यायाधिवक्ता कार्यालयमार्फत पुनरावलोकनको निवेदन दर्ता गरेको थियो। उक्त रिटमाथि सुनुवाइका लागि बिहीबार प्रधानन्यायाधीश प्रकाशमान सिंह राउत तथा न्यायाधीशहरू अब्दुल अजीज मुसलमान र नित्यानन्द पाण्डेयको पूर्ण इजलासमा पेसी तोकिएको थियो।
यसअघि न्यायाधीशहरू तेजबहादुर केसी र टंकबहादुर मोक्तानको संयुक्त इजलासले हत्यामा प्रत्यक्ष संलग्न नभएको आधार देखाउँदै बटालालाई सफाइ दिएको थियो। जबकी, काठमाडौँदेखि चितवनसम्म अपहरण गर्ने कार्यमा बटालाको प्रत्यक्ष संलग्नता रहेको दाबी अभियोग पक्षको छ। बटालाले यसअघि नै ३ वर्ष १५ दिन कैद भुक्तान गरिसकेका छन्।
यसै मुद्दामा जोडिएका अर्का आरोपित सङ्कल्प भनिने अर्जुन कार्कीको हकमा भने सर्वोच्चले जिल्ला र पुनरावेदन अदालतकै फैसला सदर गर्दै २० रुपैयाँ जरिवाना गर्ने निर्णय गरेको थियो। घटनामा संलग्न भनिएका अन्य ३ जना अझै फरार रहेकाले उनीहरूको हकमा मुद्दा मुल्तवीमा राखिएको छ।
विगतमा सर्वोच्च अदालतले नै रामहरि श्रेष्ठको अपहरणदेखि नै अपराधको सिलसिला सुरु भएको र त्यसमा संलग्नहरू कसुरदार हुने व्याख्या गरेको थियो। तर, पछि बटालाले सफाइ पाएपछि न्यायको सिद्धान्त विपरित फैसला भएको भन्दै सरकार पुनरावलोकनमा गएको हो। व्यापारी श्रेष्ठको हत्या तत्कालीन माओवादी लडाकुको शक्तिखोरस्थित शिविरमा भएको थियो।

























