
सिन्धुली । सिन्धुलीको घ्याङलेख गाउँपालिका–२, हायुटारमा रहेको एसबीआई बैंक लुटपाटमा बैंक बसेकै घरका धनीको मुख्य संलग्नता देखिएको छ। पुस २९ गते भएको उक्त लुटपाटको घटनामा संलग्न रहेको आरोपमा प्रहरीले घरधनी छविलाल स्याङ्तानसहित ७ जनालाई पक्राउ गरी सार्वजनिक गरेको छ।
जिल्ला प्रहरी कार्यालय सिन्धुलीका डीएसपी सूर्यप्रकाश सुवेदीका अनुसार घरधनी स्याङ्तानले नै लुटेराहरूलाई हतियार व्यवस्थापन गरिदिएका थिए। उनले बैंकको वस्तुस्थिति र सुरक्षा अवस्थाबारे सूचना आदानप्रदान गरी लुटपाटमा सघाएको अनुसन्धानबाट खुलेको छ। लुटपाटको योजना गत असोजदेखि नै बनेको थियो।
प्रहरीले लुटेराहरूको साथबाट २ करोड ६८ लाख ५५ हजार रुपैयाँ नगद बरामद गरेको छ। बैंकले ३ करोड ७ लाख लुटिएको जानकारी दिए पनि बाँकी रकमबारे अनुसन्धान भइरहेको छ। लुटेराहरूले बैंक लुट्न प्रयोग गरेको पेस्तोल भने नक्कली (प्लास्टिकको) रहेको र सो पेस्तोलसहित खुकुरी पनि प्रहरीले बरामद गरेको छ।
पक्राउ पर्नेहरू भागवत सिंह थापा (काभ्रे), चतुरमान बज्यु (सिन्धुली), शशाङ्क श्रेष्ठ (चितवन), मिलन गिरी (नुवाकोट), विवेक मगर (नुवाकोट), छविलाल स्याङ्तान (घरधनी, सिन्धुली) र एक जना १६ वर्षीय बालक छन् ।
लुटेराहरू पहिलो पटक पुस २३ मा दुईवटा मोटरसाइकलमा काठमाडौँबाट सिन्धुली पुगेका थिए, तर परिस्थिति अनुकूल नभएपछि फर्किए। दोस्रो पटक पुस २९ मा कोटेश्वरबाट बनेपासम्म सार्वजनिक बसमा र बनेपाबाट टाटा सुमो रिजर्भ गरेर घटनास्थल पुगी बैंक लुटेको खुलेको छ।
पक्राउ परेकाहरूमाथि चोरी तथा डाँका सम्बन्धी कसुरमा ५ दिनको म्याद थप गरी अनुसन्धान अघि बढाइएको प्रहरीले जनाएको छ।

























