एजेन्डा नै ओझेल, अनुहारको हल्ला भारी,
हावाले बोक्छ चुनाव, नीतिको सल्ला भारी।
प्रयोग गर, फल टिप- यस्तै खेल चलिरहँदा,
भाग्य ढुक्क हुन्छ कहिले? प्रश्नै पल्ला भारी॥
—
अमिल्दो चरित्र फेरि – फेरि देखिँदा कति सहनु,
इन्द्रजितको माया – जालमा प्रिय भनी कति बहनु।
आज यता, भोलि उता गर्दा मन नै थाक्छ एकदिन,
सम्मानले जहाँ बाँच्न सकिन्छ, त्यहीँसम्म हो रहनु ॥
—
म देशको झण्डा हुँ, कसैको झगडाको टालो हैन,
स्वार्थ ढाक्ने ओढ्ने, नारा- भाषणको जालो हैन।
सम्मानले फहराउने हो, आगो र भीडबाट जोगाऊ,
म इतिहासको शान हुँ- मेट्नेले ओढ्ने मालो हैन॥
– – –
पहिला नेता उचाल्ने, पछि थेचार्ने खेल देखियो,
कहिले एउटामाथि हमला, कहिले अर्को बोकियो।
नेताले पत्रकारिता, पत्रकारले राजनीति गरे देशमा,
अब जनता उठ्ने बेला आयो औँला आफैँ सोझियो॥
– – –
चेतनशील छौँ हामी – त्यसैले त प्रस्टै बोल्नुपर्छ है,
इमानदार र बहादुर युवा – भुइँमै खुट्टा टेक्नुपर्छ है।
झुक्याएर घुसेकाहरू ढाड टेकी टाउकोमा हान्छन् रे,
देशभक्तहरू सबै शसक्त भई यो संकट छेक्नुपर्छ है॥
२०८२ माघ १०, शनिबार ०८:२३
