
काठमाडौं । प्रतिनिधिसभा निर्वाचनको सुरक्षा चुनौति रहेका स्थानमा प्रहरीले विशेष टोली परिचालन गर्ने तयारी गरेको छ । हेभिवेट उम्मेदवार रहेका ठाउँहरूमा नेपाल प्रहरीले विशेष टाेली खटाउने तयारी गरेको हो ।
नेपाल प्रहरीका केन्द्रीय प्रवक्ता तथा डीआईजी अबिनारायण काफ्लेका अनुसार सुरक्षा थ्रेट हुनसक्ने ठाउँहरूमा विशेष टोली परिचालन हुनेछ । प्रहरीको उच्च सतर्कता रहेको जिल्ला झापा हो । यहाँ दुई प्रधानमन्त्रीका उम्मेदवार चुनावै मैदानमा छन् । विघठिन प्रतिनिधिसभाका सभामुख र उपसभामुख पनि चुनावी मैदानमा छन् । झापाको सुरक्षा हेर्ने गरी एसएसपीको नेतृत्वमा थप टोली परिचालन गर्ने तयारी छ ।
झापा–५ बाट एमाले अध्यक्ष तथा पूर्वप्रधानमन्त्री केपी शर्मा ओली र राष्ट्रिय स्वतन्त्र पार्टीका वरिष्ठ नेता बालेन्द्र शाह (बालेन) प्रतिस्पर्धामा छन् । झापाबाट निवर्तमान सभामुख देवराज घिमिरे र निवर्तमान उपसभामुख इन्दिरा रानामगर पनि प्रतिस्पर्धामा छन् ।
झापाको इञ्चार्जमा एसपी बसुन्धरा खड्का छिन् । झापा जिल्ला हेर्ने गरी एसएसपीको अर्को कमाण्ड खटाउने तयारी पनि भइरहेको छ । मोरङ क्षेत्र नम्बर ६ मा हेवीवेट उम्मेदवार डाक्टर शेखर कोइराला चुनावी मैदानमा छन् । मोरङमा पनि विशेष टोली पठाउने तयरी छ ।
सर्लाही जिल्लामा पनि एसएसपी खटाउने तयारी गरिएको छ । सर्लाही–४ बाट नेपाली कांग्रेसका सभापति तथा भावी प्रधानमन्त्रीका रुपमा कांग्रेसले उम्मेदवार बनाएका गगन थापा उम्मेदवार बनेका छन् । सर्लाहीबाटै नेपाली कम्युनिष्ट पार्टीका नेता तथा पूर्वगृहमन्त्री समेत रहेका नारायणकाजी श्रेष्ठ पनि उम्मेदवार बनेका छन् ।
चितवनलाई पनि सुरक्षा संवेदनशीलतामा राखिएको छ । चितवन–२ बाट रास्वपा सभापति तथा पूर्वगृहमन्त्री रवि लामिछाने उम्मेदवार बनेका छन् । निर्वाचन लक्षित ७५ हजारभन्दा बढी प्रहरी परिचालन हुँदैछन् ।

























