
काठमाडौँ। राष्ट्रिय स्वतन्त्र पार्टी (रास्वपा) सभापति रवि लामिछानेको राहदानी दुरुपयोग सम्बन्धी मुद्दामा आज (सोमबार) सर्वोच्च अदालतमा सुनुवाइ हुँदैछ। न्यायाधीशद्वय सपना प्रधान मल्ल र नृपध्वज निरौलाको संयुक्त इजलासमा यो मुद्दाको पेसी तोकिएको छ।
युवराज पौडेल (सफल) ले लामिछानेविरुद्ध राहदानी कसुरमा मुद्दा चलाउनुपर्ने माग गर्दै दुई वर्षअघि रिट दायर गरेका थिए। लामिछानेविरुद्ध मुद्दा नचलाउने महान्यायाधिवक्ता कार्यालयको निर्णय कानुनविपरीत रहेको भन्दै उनले सर्वोच्चमा चुनौती दिएका थिए। तत्कालीन महान्यायाधिवक्ता दिनमणि पोखरेलले २०७९ चैत ६ गते लामिछानेविरुद्ध राहदानी विवादमा मुद्दा नचल्ने निर्णय गरेका थिए।
यसअघि सर्वोच्चले यो मुद्दामा तीन पटक फाइल मगाउने निर्णय गरिसकेको छ। २०७९ चैत २२ गते कारण देखाऊ आदेश जारी गरेको अदालतले २०८० जेठ ९ गते आवश्यक फाइल मगाउन आदेश दिएको थियो। महान्यायाधिवक्ता कार्यालयबाट मुद्दा नचलाउनुको कारणसहितको निर्णय प्राप्त भएपछि आज यो मुद्दामा दोहोरो सुनुवाइ हुन लागेको हो।
निवेदक पौडेलले लामिछाने अमेरिकी नागरिक हुँदाहुँदै नेपाली नागरिकका नाममा राहदानी लिनु राहदानी ऐन, २०२४ विपरीतको कसुर भएको जिकिर गरेका छन्। लामिछानेको आपराधिक मनसाय नरहेको भनी महान्यायाधिवक्ताले क्षेत्राधिकार बाहिर गएर निर्णय गरेको उनको दाबी छ। सफलले लामिछानेले कुन-कुन समयमा राहदानी प्रयोग गरे भन्ने विवरण अध्यागमन विभागबाट झिकाउन र मुद्दाको अन्तिम टुङ्गो नलागेसम्म उनलाई राजनीतिक अधिकार प्रयोग गर्न नदिन अन्तरिम आदेशको समेत माग गरेका छन्।

























