
काठमाडौँ। नागरिक उन्मुक्ति पार्टीका संरक्षक रेशमलाल चौधरीले आफ्नो उम्मेदवारी खारेजी विरुद्ध दायर गरेको रिटमाथि आज (सोमबार) सर्वोच्च अदालतमा सुनुवाइ हुँदैछ। न्यायाधीशद्वय मनोजकुमार शर्मा र बालकृष्ण ढकालको संयुक्त इजलासमा उक्त रिटको सुनुवाइका लागि पेसी तोकिएको छ।
आगामी फागुन २१ गते हुने प्रतिनिधिसभा सदस्यको उपनिर्वाचनका लागि कैलाली क्षेत्र नम्बर १ बाट मनोनयन दर्ता गरेका चौधरीको उम्मेदवारी निर्वाचन आयोगले खारेज गरिदिएको थियो। आयोगको उक्त निर्णयले आफ्नो संवैधानिक अधिकार हनन भएको दाबी गर्दै उनले सर्वोच्चमा रिट दिएका थिए।
यसअघि न्यायाधीश बालकृष्ण ढकालको एकल इजलासले चौधरीको रिटमाथि प्रारम्भिक सुनुवाइ गर्दै निर्वाचन आयोगसँग लिखित जवाफ माग गरेको थियो। अदालतले अन्तरिम आदेश दिने वा नदिने भन्ने विषयमा छलफल गर्न आज दुवै पक्षलाई बोलाएको हो। आजको बहसपछि अदालतले चौधरीको उम्मेदवारी कायम रहने वा नरहनेबारे महत्वपूर्ण आदेश दिने अपेक्षा गरिएको छ।

























