
काठमाडौँ । पोखराको चर्चित लिचिबारी भ्रष्टाचार प्रकरणमा थुनामा रहेका पूर्वमन्त्री राजकुमार गुप्ताको निवेदनमाथि सर्वोच्च अदालतमा आज सुनुवाइ हुँदैछ। विशेष अदालतले धरौटीमा छाड्न अस्वीकार गर्दै पुर्पक्षका लागि थुनामा पठाएपछि गुप्ताले सर्वोच्चमा पुनरावेदन दिएका थिए।
न्यायाधीशद्वय विनोद शर्मा र शान्तिसिंह थापाको संयुक्त इजलासमा उक्त निवेदनको पेसी तोकिएको छ। यसअघि न्यायाधीश सपना प्रधान मल्ल र नृपध्वज निरौलाको इजलासले यसै मुद्दाका अन्य प्रतिवादीहरूको निवेदनको अवस्था बुझ्न आदेश दिएको थियो।
गुप्तामाथि कास्कीको मालपोत कार्यालयका प्रमुखको सरुवा रोक्ने र भूमि आयोगमा सदस्य बनाइदिने प्रलोभन देखाएर व्यवसायीबाट ५३ लाख रुपैयाँ घुस लिएको आरोप छ। अख्तियार दुरुपयोग अनुसन्धान आयोगले उनी र अर्की पूर्वमन्त्री रन्जिता श्रेष्ठविरुद्ध मिलेमतोमा २५ लाख रुपैयाँ घुस लिएको अभियोगमा मुद्दा दायर गरेको थियो।
गुप्ताले अदालतमा आफूमाथि लागेको आरोप झुटो भएको दाबी गरे पनि विशेष अदालतले प्राप्त प्रमाणका आधारमा उनलाई निर्दोष मान्न नसकिने ठहर गरेको थियो। आजको सुनुवाइले गुप्तालाई थुनामै राख्ने वा धरौटीमा छाड्ने भन्नेबारे निर्णय गर्नेछ।

























