
इटहरी । नयन मिडिया फाउन्डेसनले आयोजना गर्दै आएको ‘कोशी एक्सिलेन्स अवार्ड २०२६’ को मिति निर्वाचन आचारसंहिताका कारण परिवर्तन गरिएको छ। फागुन २१ गते हुन लागेको प्रतिनिधिसभा निर्वाचनलाई मध्यनजर गर्दै पूर्व निर्धारित फागुन ७ गतेको कार्यक्रमलाई सारिएको हो।
आयोजकले आज (शुक्रबार) एक विज्ञप्ति जारी गर्दै निर्वाचन आयोगको आचारसंहिता पालना गर्नुपर्ने भएकाले कार्यक्रमको समयतालिका परिवर्तन गरिएको जनाएको छ। नयाँ निर्णयअनुसार यो अवार्ड कार्यक्रम अब आगामी चैत ७ गते इटहरीस्थित सोल्टी वेस्टेन्ड होटलमा आयोजना हुनेछ।
कोशी प्रदेशको पर्यटन, व्यापार र सामाजिक-सांस्कृतिक पहिचान प्रवर्द्धन गर्ने उद्देश्यले सुरु गरिएको यस अवार्डको यो दोस्रो संस्करण हो। विभिन्न क्षेत्रमा उत्कृष्ट योगदान पुर्याउने व्यक्तित्व र संस्थाहरूलाई सम्मान गरिने यस कार्यक्रमलाई निर्वाचनपछि अझ सुव्यवस्थित र भव्य रूपमा सम्पन्न गरिने आयोजकले प्रतिबद्धता व्यक्त गरेको छ।
नयन मिडिया फाउन्डेसनका अध्यक्ष पवन अधिकारीले निर्वाचनको संवेदनशील समयमा आयोगको नियम पालना गर्नु सबैको दायित्व भएको बताउँदै मिति परिवर्तनबाट पर्न गएको असुविधाप्रति क्षमायाचना गरेका छन्।

























