विराटनगरमा सीटी सफारी नियमनको नयाँ चरण, पहिचानका लागि चालकलाई पोसाक

Share this
745shares
मुलुकी खबर
मुलुकी खबर
clock२०८२ माघ २६, सोमबार १६:४०

विराटनगर । कोशी प्रदेशको राजधानी विराटनगरमा सीटी सफारी (ई–रिक्सा) नियमन नयाँ चरणमा प्रवेश गरेको छ । पहिचानका लागि सफारी चालकलाई छुट्टै पोसाकको व्यवस्था गरिएको छ ।

वर्षौंदेखि अराजक, असुरक्षित र अव्यवस्थित रूपमा सञ्चालन हुँदै आएका सीटी सफारी अब ‘सुरक्षित चालक’को स्पष्ट पहिचानसहित सडकमा देखिने छन् । यात्रु सुरक्षालाई केन्द्रमा राख्दै जिल्ला ट्राफिक प्रहरी कार्यालय मोरङले सुरु गरेको ‘सुरक्षित चालक’ अभियानले सहरको सार्वजनिक यातायात व्यवस्थापनमा नयाँ अध्यायको थालनी गरेको हो ।

सुरक्षित चालक अभियानअन्तर्गत सोमबार विराटनगर महानगरपालिका–१ मा आयोजित कार्यक्रममा सवारी चालक अनुमतिपत्र (लाइसेन्स) प्राप्त गरेका ५ सय जना सफारी चालकलाई ‘सुरक्षित चालक’ लेखिएको विशेष ज्याकेट (पोसाक) वितरण गरिएको छ । कोशी प्रदेशका प्रहरी प्रमुख डीआईजी विनोद घिमिरेलगायतले पोसाक वितरण गरेका हुन् ।

कार्यक्रमलाई सम्बोधन गर्दै डीआईजी घिमिरेले सवारी दुर्घटना न्यूनीकरणका लागि चालक स्वयं जिम्मेवार र अनुशासित हुनुपर्नेमा जोड दिए । उनले नियमअनुसार लाइसेन्स लिएर सवारी सञ्चालन गर्ने चालक नै वास्तविक अर्थमा सुरक्षित चालक हुने उल्लेख गर्दै पोसाकले पहिचान झल्काउनुका साथै चालकलाई जिम्मेवारीको बोध गराउने बताए ।

‘जसरी प्रहरीलाई बर्दीले अनुशासनको स्मरण गराउँछ । त्यसैगरी सुरक्षित चालकको ज्याकेटले चालकलाई नियमभित्र राख्नेछ,’ डीआईजी घिमिरेले भने । उनले पोसाकलाई मर्यादा र जिम्मेवारीसँग जोड्दै अमर्यादित, गैरकानुनी र जोखिमपूर्ण गतिविधिमा संलग्न नहुन चालकहरूलाई आग्रह गरे ।

ट्राफिक प्रहरी कर्मचारीहरूलाई पनि सवारी चालक, सहचालक र सडक प्रयोगकर्ताप्रति समान व्यवहार गर्दै प्रभावकारी ट्राफिक व्यवस्थापन गर्न घिमिरेको निर्देशन छ । नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरीका प्रमुख एसपी दीपक गिरीले विराटनगरमा सञ्चालनमा रहेका सीटी सफारीलाई व्यवस्थित र सुरक्षित बनाउने उद्देश्यले अभियान सुरु गरिएको जानकारी दिए ।

छोटो दूरीको यात्रामा उपयोगी साधन भए पनि ट्राफिक नियम उल्लंघन र असुरक्षित सञ्चालनका कारण दुर्घटनाको जोखिम बढ्दै गएको उल्लेख गर्दै उनले चालक पोसाकले नियम पालनामा सकारात्मक प्रभाव पार्ने बताए । यो अभियान सडक सुशासन र दुर्घटना न्यूनीकरणसँग प्रत्यक्ष जोडिएको एसपी गिरीको भनाइ छ ।

कोशी प्रदेशको राजधानी तथा प्रमुख औद्योगिक सहर विराटनगरमा सीटी सफारीलाई कानुनी दायरामा ल्याएर मर्यादित र यात्रुमैत्री बनाउन सुरक्षित चालक अभियान अघि बढाइएको मोरङ ट्राफिक प्रहरी प्रमुख इन्स्पेक्टर सन्तोष न्यौपानेले बताए । उनका अनुसार नेपालमै पहिलोपटक ट्राफिक प्रहरीले कम्प्युटर प्रणालीमार्फत सीटी सफारी चालकको डिजिटल अभिलेख तयार पारेको छ ।

दर्ता भएपछि प्रत्येक चालकलाई छुट्टै दर्ता नम्बर दिइन्छ । जुन ‘सुरक्षित चालक’ लेखिएको ज्याकेटको पछाडि स्पष्ट देखिने गरी छापिएको हुन्छ । अब यात्रुले चालकको नाम वा सफारी नम्बर सम्झनु पर्ने छैन । दर्ता नम्बरकै आधारमा गुनासो र उजुरी गर्न वा अन्य सुझाव दिन सक्ने छन् ।

दर्ता हुनुअघि चालकले अनिवार्य रूपमा ट्राफिक नियम र सुरक्षित सवारी सञ्चालनसम्बन्धी अनुशिक्षण तालिम लिनुपर्ने व्यवस्था गरिएको छ । ज्याकेट पोसाक मात्र नभएर जिम्मेवारीको प्रतीक भएको इन्स्पेक्टर न्यौपानेको भनाइ छ । ‘सुरक्षित चालक भनेको प्रशिक्षित, प्रमाणित र उत्तरदायी चालक हो,’ उनले भने ।

विराटनगर भारतीय सीमानजिक भएकाले भारतीय नागरिकद्वारा अवैध रूपमा सीटी सफारी सञ्चालन हुने समस्या लामो समयदेखि देखिँदै आएको थियो । यसले सुरक्षा जोखिमसँगै स्थानीय आम्दानी बाहिरिने अवस्था सिर्जना गरेको ट्राफिक प्रहरीको निष्कर्ष छ ।

यही कारण सफारी दर्ताका लागि नेपाली नागरिकता र सवारी चालक अनुमतिपत्र अनिवार्य गरिएको छ । सबै प्रक्रिया पूर्णतः निःशुल्क रहेको प्रहरीले जनाएको छ ।

‘विकल्प एण्ड अल्टरनेटिभ’ संस्थाले गरेको सर्वेक्षणमा विराटनगरमा ८४ प्रतिशतभन्दा बढी सफारी चालकसँग लाइसेन्स नभएको तथ्य सार्वजनिक भएपछि नियमनको आवश्यकता झनै स्पष्ट भएको थियो । यही पृष्ठभूमिमा कोशी प्रदेश सरकारले सवारी तथा यातायात व्यवस्था नियमावली संशोधन गर्दै सीटी सफारी चालकका लागि लिखित परीक्षा हटाएर प्रयोगात्मक (ट्रायल) परीक्षा मात्र लिने व्यवस्था गरेको छ ।

अधिकांश चालक निरक्षर वा कम पढेका भएकाले लिखित परीक्षा पास गर्न नसक्ने समस्यालाई सम्बोधन गर्ने उद्देश्यले गरिएको यो निर्णयलाई व्यवहारिक र समावेशी मानिएको छ । ट्राफिक प्रहरीले सफारी चालकको दर्ता प्रक्रिया गत पुस १७ गतेबाट सुरु गरेको थियो ।

ट्राफिक प्रहरीले अबदेखि विराटनगरमा लाइसेन्स, ब्लुबुक र सुरक्षित चालक पोसाकबिना सफारी सञ्चालनमा पूर्ण प्रतिबन्ध लगाउने छ । ज्याकेटको दुरुपयोग, नक्कली प्रयोग वा अरुलाई हस्तान्तरण गरे कडा कारबाही गरिने चेतावनी पनि दिइएको छ ।

कार्यक्रममा विराटनगर महानगरपालिकाका प्रमुख प्रशासकीय अधिकृत योगेन्द्रप्रसाद दुलालले ट्राफिक प्रहरीसँग सहकार्य गर्दै सीटी सफारीलाई सुरक्षित, व्यवस्थित र मर्यादित बनाउन महानगरले भूमिका खेल्ने प्रतिबद्धता जनाए । सफारी चालक संघका प्रतिनिधि भगवान बस्नेतले पनि अभियानले आफ्नो पेसालाई सम्मानित र सुरक्षित बनाउने भन्दै सबै चालकलाई नियम पालना गर्न आग्रह गरे ।

डीआईजी घिमिरेसहित अतिथिहरूले सुरक्षित यात्राको कामनासहित चालकहरूलाई नम्बर अंकित ‘सुरक्षित चालक’ ज्याकेट हस्तान्तरण गरेका थिए । कार्यक्रममा यातायात व्यवस्था कार्यालय विराटनगरका प्रमुख गोपाल दाहाल, मोरङ प्रहरी प्रमुख एसपी कवित कटवाल, ‘विकल्प एण्ड अल्टरनेटिभ’का संस्थापक वसन्त अधिकारी, नागरिक समाजका अगुवा तथा सफारी चालकहरूको उपस्थिति रहेको थियो ।

ट्राफिक प्रहरीका अनुसार ‘सुरक्षित चालक’ अभियानले दुर्घटना न्यूनीकरण, यात्रु सुरक्षाको प्रत्याभूति, अवैध सञ्चालनको अन्त्य र हजारौँ श्रमिक परिवारको जीवनमा स्थायित्व ल्याउने लक्ष्य लिएको छ । विराटनगरबाट सुरु भएको अभियानलाई मोरङ जिल्लाभर र कोशी प्रदेशका अन्य सहरसम्म विस्तार गर्ने तयारी समेत भइरहेको छ ।

तपाइको प्रतिक्रिया
युरोपबाट रुवान्डासम्म आप्रवासी निष्कासनको नयाँ अभ्यास, पाँच देशको संयुक्त योजना
मोरङमा ठूला चाडपर्व शान्तिपूर्ण, २१९ आपराधिक घटना
 एनपिएलको तेस्रो संस्करण कात्तिक ९ देखि
फाइनल पुग्न लुम्बिनी र सुदूरपश्चिमबीच निर्णायक भिडन्त
प्रधानमन्त्री बालेनको भारत भ्रमण : दिल्लीमा छोटो बसाइ, नेपालका एजेन्डा लामै
विराटनगरबाट लागुऔषधसहित एक युवक पक्राउ
ब्राउन सुगरसहित इटहरीका दुई युवक पक्राउ
कोशी प्रदेशमा एकै दिन १७ सवारी दुर्घटना, २३ जना घाइते (पूरा विवरणसहित)
बराहक्षेत्रमा चलिरहेको मोटरसाइकलबाट खसेकी युवतीको उपचारका क्रममा मृत्यु
कोशी र गण्डकीका हिमाली क्षेत्रमा वर्षा र हिमपातको सम्भावना
स्थानीय निर्वाचनको तयारीमा एमाले, ३ हजार ४१४ नेता–कार्यकर्तासहितको राष्ट्रिय भेला
यस्तो छ विदेशी मुद्राको विनिमय दर
यस्तो छ विदेशी मुद्राको विनिमयदर
© 2024 Muluki Khabar. All Rights Reserved. Design & Develop By: Indesign Media Pvt. Ltd.