
काठमाडौं । सर्वोच्च अदालतले सवारी साधनहरूमा अंग्रेजी भाषाको इम्बोस्ड नम्बर प्लेट अनिवार्य नगर्न सरकारका नाममा अन्तरिम आदेश जारी गरेको छ। न्यायाधीशहरू कुमार रेग्मी र महेश शर्मा पौडेलको इजलासले यातायात व्यवस्था विभागले गत भदौ ३ गते जारी गरेको सूचना कार्यान्वयन नगर्न आदेश दिएको हो।
तत्कालीन भौतिक पूर्वाधार मन्त्री देवेन्द्र दाहालको अध्यक्षतामा बसेको बैठकले इम्बोस्ड नम्बर प्लेट जडानलाई अनिवार्य गर्ने निर्णय गरेको थियो। सो निर्णयका विरुद्ध अधिवक्ता रामबहादुर रावलले सर्वोच्चमा रिट दायर गरेका थिए। अदालतले आइतबार जारी गरेको आदेशमा मन्त्रीको निर्णय र विभागको सूचनालाई सुविधा र सन्तुलनको दृष्टिकोणबाट तत्काल कार्यान्वयन नगर्न र नगराउन भनिएको छ।
यसअघि २०७६ मंसिर २७ गते पनि सर्वोच्चले सवारी साधनमा जडान गरिने नम्बर प्लेटमा अक्षर र अंक दुवै नेपाली भाषामा हुनुपर्ने आदेश दिएको थियो। त्यस समयमा भाषा आयोगले समेत नेपाली भाषाको प्रयोगका लागि सरकारको ध्यानाकर्षण गराएको थियो। तर, सरकारले पुनः अंग्रेजी भाषामै इम्बोस्ड प्लेट अनिवार्य गर्न खोजेपछि अदालतले त्यसलाई रोकेको हो।

























