
रामेछाप । रामेछापमा बस दुर्घटना हुँदा ६ जनाको मृत्यु भएको छ । काठमाडौंबाट ओखलढुंगाको पोल्थलीतर्फ जाँदै गरेको अरनिको यातायात समितिको ३-०१-००५ ख ९९७५ नम्बरको बस मंगलबार बिहान रामेछापको मन्थली नगरपालिका–९ त्रिवेणी क्षेत्र नजिकै दुर्घटना भई तामाकोशी नदीमा खसेको थियो ।
जिल्ला प्रहरी कार्यालय रामेछापका अनुसार दुर्घटनास्थलबाट हालसम्म ६ जनाको शव निकालिएको छ । १३ जनाको उद्धार गरिएको छ । उद्धार गरिएकामध्ये केही घाइतेको अवस्था गम्भीर रहेको प्रहरीले जनाएको छ । मृतकको पहिचान खुल्न बाँकी छ ।
प्रहरीले दिएको जानकारी अनुसार घटनास्थलबाट ६ जनाको शव बाहिर निकालिएको हो । रामेछाप प्रहरीका इन्स्पेक्टर राजन तिमल्सिनाले दुर्घटनापछि तत्काल उद्धार सुरु गरिएको जानकारी दिए । उनका अनुसार बस सिधै तामाकोशी नदीमा खसेको हुँदा उद्धार कार्य चुनौतीपूर्ण बनेको छ ।
‘उद्धार कार्य निरन्तर जारी छ । हालसम्म शवको पहिचान हुन सकेको छैन । मृतक संख्या अझै बढ्न सक्ने सम्भावना छ,’ उनले भने । बसमा कति यात्रु सवार थिए भन्ने विषयमा प्रारम्भिक विवरण आए पनि दुर्घटनाको यकिन कारण भने खुल्न सकेको छैन।
अरनिको यातायात समितिले दिएको जानकारीअनुसार बसमा जडिबुटीबाट ५ जना र चाबहिलबाट ३ जना यात्रुले टिकट काटेका थिए । त्यस्तै, चालक, सहचालक र बस व्यवसायी गरी ३ जना थप हुँदा बसमा जम्मा ११ जना सवार रहेको प्रारम्भिक विवरण छ । यद्यपि, यात्रु संख्या र सूचीबारे थप पुष्टि गर्ने काम भइरहेको प्रहरीले जनाएको छ।
दुर्घटनाको कारणबारे अनुसन्धान सुरु गरिएको छ । घटनास्थलमा सुरक्षाकर्मीको उपस्थिति बढाइएको छ । नदीको बहाव तीव्र रहेकाले उद्धारमा कठिनाइ भए पनि सम्भावित यात्रुको खोजी अझै जारी राखिएको प्रहरीले जनाएको छ ।

























