
धनकुटा। जेनजी आन्दोलनका क्रममा झुम्का कारागारबाट फरार भएका ८ जना कैदीबन्दीलाई धनकुटा प्रहरीले पक्राउ गरेको छ। विभिन्न गम्भीर मुद्दामा सजाय काटिरहेका उनीहरूलाई जिल्लाका विभिन्न स्थानबाट पक्राउ गरिएको हो।
धनकुटाका प्रहरी उपरीक्षक सरतकुमार थापा क्षेत्रीका अनुसार पक्राउ पर्नेहरूमा कर्तव्य ज्यान, अंगभंग, जबर्जस्ती चोरी र लागुऔषध मुद्दाका दोषीहरू रहेका छन्। पक्राउ परेकामध्ये संखुवासभाका युवराज राईलाई भेडेटारबाट नियन्त्रणमा लिइएको छ भने अन्यलाई उनीहरूकै घर वा लुकिछिपी बसेको अवस्थामा फेला पारिएको हो।
पक्राउ पर्नेमा कर्तव्य ज्यान मुद्दामा २५ वर्ष कैद सजाय पाएका सागर राई र २० वर्ष कैद तोकिएका रमेश माङ्मी मगर समेत रहेका छन्। यस्तै, लागुऔषध गाँजा मुद्दामा पुर्पक्षका लागि थुनामा रहेका सुरेश शिवा, अनिल सहनी, संगम माझी र बुद्धराज लिम्बुलाई पनि पुनः कारागार चलान गरिएको छ।
प्रहरीले अंगभंग मुद्दाका फरार कैदी सिजन तामाङलाई पनि घरैबाट पक्राउ गरेको बताएको छ। कारागारबाट फरार भई लुकिछिपी बस्दै आएका उनीहरूलाई विशेष सूचनाका आधारमा प्रहरीले सक्रियता देखाई नियन्त्रणमा लिएको हो।

























