दुर्घटनापछि प्रशासन कार्यालय घेराउ, प्रहरीद्वारा हवाइ फायर

Share this
686shares
मुलुकी खबर
मुलुकी खबर
clock२०८२ माघ २९, बिहीबार ०६:१५

रामेछाप । रामेछापमा भएको यात्रुवाहक बस दुर्घटनापछि मृतकका परिवार र आफन्तले क्षतिपूर्ति तथा अन्य माग राख्दै बुधबार दिनभरि सडक अवरुद्ध गरेका छन् ।

दिनभर जारी विरोध साँझपख झनै चर्किँदा जिल्ला प्रशासन कार्यालय रामेछापको मूल गेटमै प्रदर्शनकारीहरूले घेराउ गर्दै नाराबाजी गरेपछि स्थिति तनावपूर्ण बन्यो । अवस्था नियन्त्रणबाहिर जान थालेसँगै भिड तितरबितर पार्न प्रहरीले ३ राउन्ड हवाइ फायर गरेको छ । केही सेल अश्रुग्याससमेत प्रहार गरेको छ ।

दुर्घटनापछि आक्रोशित बनेका मृतकका परिवारले सुरुवातदेखि नै सडक अवरुद्ध गरेर दबाब सिर्जना गरिरहेका थिए । उनीहरूको मुख्य माग अरनिको यातायात सेवा समितिका जिम्मेवार पदाधिकारी स्वयं रामेछाप आएर वार्तामा बस्नुपर्ने रहेको छ ।

साथै, उनीहरूले प्रतिमृतक २५ लाख रुपैयाँ राहत उपलब्ध गराउनुपर्ने, मृतकका परिवारका १ सदस्यलाई रोजगारीको व्यवस्था गरिनुपर्ने, मृतकका बालबालिकाको सम्पूर्ण शिक्षाको जिम्मेवारी राज्य वा सम्बन्धित यातायात समितिले लिनुपर्ने, घाइतेहरूको निःशुल्क तथा पूर्ण उपचारको ग्यारेन्टी हुनुपर्ने र दुर्घटनामा बेपत्ता भएका यात्रुको तत्काल खोजी गरी अवस्थाबारे स्पष्ट जानकारी दिनुपर्ने माग राखेका छन् ।

बुधबार साँझसम्म पनि अरनिको यातायात सेवा समितिका केन्द्रीय पदाधिकारी रामेछाप नआएको भन्दै पीडित पक्ष झन् आक्रोशित बनेको थियो । जिल्लामै रहेका समितिका काउन्टर प्रमुख सुवास फुँयालले कानुनअनुसार प्रति मृतक ५ लाख रुपैयाँ क्षतिपूर्ति र ३० हजार रुपैयाँ क्रियाखर्च दिने प्रावधान रहेको जानकारी दिएका छन् ।

तर, मृतकका परिवारले उक्त प्रस्ताव अस्वीकार गर्दै यसलाई न्यून र पीडामाथिको अपमानका रूपमा व्याख्या गरेका छन् । प्रशासन कार्यालय परिसरमा प्रदर्शन भइरहँदा भित्र सर्वदलीय बैठक जारी रहेको थियो ।

जिल्ला प्रशासन, प्रहरी, राजनीतिक दलका प्रतिनिधि तथा सरोकारवालाहरूको उपस्थितिमा समाधान खोज्ने प्रयास भइरहेको छ । तर साँझसम्म पीडित पक्षका मुख्य मागमा सहमति जुट्न नसकेपछि प्रदर्शन जारी रहयो ।

स्थिति नियन्त्रण गर्न सुरक्षाकर्मीको संख्या बढाइएको छ । साँझतिर भीड आक्रामक बन्दै प्रशासन कार्यालयको मूल गेटतर्फ धकेलिन थालेपछि प्रहरीले पहिलो चरणमा चेतावनी दिएको थियो । तर, भिड आक्रामक बनेपछि प्रहरीले हवाई फायर र अश्रुग्यास प्रहार गरेको हो ।

यसैबीच, दुर्घटनामा परी ३ जना अझै बेपत्ता रहेको भन्दै पीडित पक्षका आफन्तहरूले जिल्ला प्रहरी कार्यालय रामेछापमा औपचारिक निवेदन दिएका छन् । प्रहरीका अनुसार उमाकुण्ड गाउँपालिका–६ का २४ वर्षीय विशाल सुनुवार, लिखु तामाकोशी गाउँपालिका–७ की ८ वर्षीया रेमिसा तामाङ र मन्थली नगरपालिका–२ का ९ वर्षीय क्रिचन तामाङ हालसम्म फेला परेका छैनन् ।

खोज तथा उद्धार कार्य जारी रहेको भन्दै प्रहरीले बुधबार साँझसम्म उनीहरूको अवस्था अज्ञात नै रहेको जनाएको छ । स्थानीय र नागरिक समाजका प्रतिनिधिहरूले घटनाको निष्पक्ष छानबिन, पीडितलाई यथोचित राहत तथा दीर्घकालीन सुरक्षा उपाय अवलम्बन गर्नुपर्ने माग गरेका छन् । उनीहरूले हरेक दुर्घटनापछि सामान्य क्षतिपूर्तिको प्रस्ताव राखेर जिम्मेवारी टार्ने प्रवृत्ति अन्त्य हुनुपर्ने र सार्वजनिक यातायात सेवामा कडाइका साथ अनुगमन गर्नुपर्ने माग राखेका छन् ।

तपाइको प्रतिक्रिया
युरोपबाट रुवान्डासम्म आप्रवासी निष्कासनको नयाँ अभ्यास, पाँच देशको संयुक्त योजना
मोरङमा ठूला चाडपर्व शान्तिपूर्ण, २१९ आपराधिक घटना
 एनपिएलको तेस्रो संस्करण कात्तिक ९ देखि
फाइनल पुग्न लुम्बिनी र सुदूरपश्चिमबीच निर्णायक भिडन्त
प्रधानमन्त्री बालेनको भारत भ्रमण : दिल्लीमा छोटो बसाइ, नेपालका एजेन्डा लामै
विराटनगरबाट लागुऔषधसहित एक युवक पक्राउ
ब्राउन सुगरसहित इटहरीका दुई युवक पक्राउ
कोशी प्रदेशमा एकै दिन १७ सवारी दुर्घटना, २३ जना घाइते (पूरा विवरणसहित)
बराहक्षेत्रमा चलिरहेको मोटरसाइकलबाट खसेकी युवतीको उपचारका क्रममा मृत्यु
कोशी र गण्डकीका हिमाली क्षेत्रमा वर्षा र हिमपातको सम्भावना
स्थानीय निर्वाचनको तयारीमा एमाले, ३ हजार ४१४ नेता–कार्यकर्तासहितको राष्ट्रिय भेला
यस्तो छ विदेशी मुद्राको विनिमय दर
यस्तो छ विदेशी मुद्राको विनिमयदर
© 2024 Muluki Khabar. All Rights Reserved. Design & Develop By: Indesign Media Pvt. Ltd.