
झापा । झापा भ्रमणमा रहेका पूर्वराजा ज्ञानेन्द्र शाह शुक्रबार हेलिकप्टरमार्फत काठमाडौँ फर्किएका छन् । सुरुमा बुद्ध एयरको नियमित विमानमार्फत काठमाडौँ आउने तालिका भए पनि अन्तिम समयमा उनी कैलाश एयरको हेलिकप्टर चढेर उडेका हुन् ।
खराब मौसमका कारण जहाज आउन ढिलो हुने भएपछि पूर्वराजाले हेलिकप्टर रोजेको सुरक्षा स्रोतले बताएको छ । उनी मध्यान्ह १२ बजे झापाबाट प्रस्थान गरेका हुन् । करिब १ घण्टा १० मिनेटको उडानपछि उनी काठमाडौँको त्रिभुवन अन्तर्राष्ट्रिय विमानस्थलमा ओर्लिनेछन् ।
काठमाडौँमा राजावादीहरूले उनको स्वागतका लागि विमानस्थल बाहिर मानिस उतार्ने तयारी गरेका छन् । सो क्रममा हुनसक्ने सम्भावित प्रदर्शन र उच्छृङ्खल गतिविधिलाई मध्यनजर गर्दै प्रहरीले विमानस्थल क्षेत्रको सुरक्षा व्यवस्था निकै कडा बनाएको छ ।

























