
झापा । राष्ट्रिय स्वतन्त्र पार्टी (रास्वपा) का वरिष्ठ नेता एवम् झापा क्षेत्र नम्बर ५ का उम्मेदवार बालेन्द्र शाहले काठमाडौँको फोहोर व्यवस्थापनमा ठुलो अन्तर्राष्ट्रिय चलखेल हुने गरेको बताएका छन्। सोमबार बिहान आफ्नो निर्वाचन क्षेत्रका मतदाताहरूसँगको संवादमा उनले यस्तो दाबी गरेका हुन्।
काठमाडौँ महानगरपालिकाको नेतृत्व गर्नु प्रधानमन्त्री हुनुभन्दा कम चुनौतीपूर्ण नरहेको उनले उल्लेख गरे। विशेषगरी फोहोरमैला र सुकुम्बासी समस्या समाधान गर्ने प्रयासमा आफूले निकै ठुलो अवरोध र बाह्य चलखेल महसुस गरेको उनले बताए। काठमाडौँका सुकुम्बासी बस्तीमा बस्ने धेरैजसो मानिसहरू वास्तविक सुकुम्बासी नभएको उनको जिकिर छ। उनीहरू विभिन्न राजनीतिक दलहरूद्वारा संरक्षित र परिचालित भएको उनले आरोप लगाए।
एक हप्ता लामो मधेस र बागमती प्रदेशको भ्रमण सकेर बालेन सोमबार नै झापा फर्किएका हुन्। उनले सोमबार बिहानैदेखि झापा क्षेत्र नम्बर ५ मा घरदैलो कार्यक्रम सुरु गरी मतदातासँग अन्तरक्रिया गरिरहेका छन्।

























