फाइल फोटो ।विराटनगर । विराटनगर विमानस्थलबाट काठमाडौंका लागि उडेको बुद्ध एयरको जहाजमा उडान भरेको केही मिनेटमै प्राविधिक समस्या देखिएपछि विमानलाई पुनः विराटनगर विमानस्थलमै फर्काएर सुरक्षित अवतरण गराइएको छ । जहाजमा सवार सबै यात्रु तथा चालक दलका सदस्य सकुशल रहेका छन् ।
बुधबार राति ९ बजेर ४९ मिनेटमा विराटनगर विमानस्थलबाट काठमाडौंका लागि उडेको यू ४–७१४९ एन–ए एन क्यू कलसाइन भएको जहाजले आकाशमा करिब ६ मिनेटको उडान पूरा गरेलगत्तै प्राविधिक समस्या देखिएको थियो । जहाजमा २५ पुरुष र ५ महिला गरी ३० जना यात्रु तथा चालक दलका ४ सदस्यसहित ३४ जना जहाजमा सवार थिए ।
विराटनगर विमानस्थलका प्रमुख सुवास झाले उडानपछि दाहिने इन्जिनतर्फ असामान्य संकेत देखिएसँगै चालक दलका सदस्यले तत्काल सतर्कता अपनाएको जानकारी दिए । उनका अनुसार पाइलटले हवाई ट्राफिक कन्ट्रोलसँग समन्वय गरी जहाजलाई सुरक्षित रूपमा फर्काउने निर्णय गरेका हुन् ।
‘उडान भरेको ६ मिनेटमै प्राविधिक समस्या देखियो । त्यसपछि जहाजलाई घुमाएर विराटनगरमै फर्काइयो । अन्य कुनै जटिल अवस्था सिर्जना भएन,’ झाले भने । जहाज राति १० बजेर १३ मिनेटमा पुनः विराटनगर विमानस्थलमै अवतरण गरेको थियो ।
अवतरणका क्रममा विमानस्थलमा आकस्मिक तयारीलाई सक्रिय राखिएको थियो । तर, जहाज सामान्य प्रक्रियाअनुसार सुरक्षित रूपमा धावनमार्गमा अवतरण गरेपछि सम्भावित जोखिम टरेको थियो । विमानस्थल प्रशासनका अनुसार यात्रुहरूमा सामान्य त्रासबाहेक अन्य कुनै समस्या देखिएको छैन ।
चालक दलले प्रारम्भिक रूपमा दाहिने इन्जिनमा प्राविधिक गडबडी देखिएको जानकारी गराएका छन् । विस्तृत परीक्षणका लागि काठमाडौंबाट प्राविधिक टोली विराटनगर झिकाउने तयारी गरिएको छ । समस्या पहिचान गरी समाधान भएपछि मात्र जहाजलाई पुनः नियमित उडानमा ल्याइने झाले बताए । प्राविधिक परीक्षण पूरा नभएसम्म उक्त जहाज ग्राउन्डेड अवस्थामै रहनेछ ।
यस घटनापछि काठमाडौं जान नसकेका यात्रुहरूलाई वैकल्पिक व्यवस्थामार्फत गन्तव्य पठाइएको छ । काठमाडौंबाटै आएको बुद्ध एयरको अर्को जहाजमा राखेर यात्रुहरूलाई बुधबार राति नै काठमाडौं पठाइएको विमानस्थल प्रमुख झाले बताए ।
हवाई उडानमा प्राविधिक समस्या देखिनु असामान्य नभए पनि समयमै पहिचान र सतर्क निर्णयले ठूलो दुर्घटना टर्न सक्ने विज्ञहरू बताउँछन् । पाइलटले प्रारम्भिक चरणमै समस्या पत्ता लगाएर उचित निर्णय लिनु सुरक्षा दृष्टिकोणले उपयुक्त कदम मानिन्छ ।
नेपालका आन्तरिक उडानहरूमा पछिल्ला वर्षहरूमा प्राविधिक परीक्षण र मर्मतसम्भारलाई कडाइ गरिएको छ । विशेष गरी उडानमा उपकरणीय संकेतमा देखिने सानो असामान्यता पनि बेवास्ता नगर्ने नीति अपनाइँदै आएको छ ।

























