
काठमाडौं । नेपाली कांग्रेसले आगामी फागुन २१ गते हुने प्रतिनिधिसभा निर्वाचन बिथोल्न विभिन्न तत्वहरू सक्रिय रहेको बताएको छ। पार्टी केन्द्रीय कार्यालय सानेपामा आयोजित पत्रकार सम्मेलनमा प्रवक्ता देवराज चालिसेले निर्वाचन विरोधी रणनीतिलाई असफल पार्दै तोकिएकै समयमा चुनाव गराउन सरकार दृढ हुनुपर्ने बताए।
लोकतान्त्रिक शासन व्यवस्थामा शासनको वैधताको मुख्य स्रोत जनताको मत भएको चर्चा गर्दै प्रवक्ता चालिसेले जनसर्वोच्चतालाई सबैले स्वीकार्नुपर्नेमा जोड दिए। ‘निर्वाचन समयमा हुन नदिन विभिन्न तत्वहरू लागिरहेका छन्, तर सरकारले दृढताका साथ निर्वाचन सम्पन्न गर्नुपर्छ,’उनले भने। उनले सबै राजनीतिक दलहरूका लागि निर्वाचनमा सहभागी हुनुको विकल्प नरहेको समेत स्पष्ट पारे।
पूर्वराजा ज्ञानेन्द्र शाहले निर्वाचनअघि ‘राष्ट्रिय सहमति’ को कुरा गरेको सन्दर्भमा सोधिएको प्रश्नमा प्रवक्ता चालिसेले त्यसलाई निजी अभिव्यक्तिको संज्ञा दिए। उनले भने, ‘प्रत्येक व्यक्तिको आफ्नो स्वतन्त्रता हुन्छ, त्यसैले निजी अभिव्यक्तिमा पार्टीले कुनै टिप्पणी गर्दैन। तर, देशको शासन चलाउने वैधानिक बाटो निर्वाचन र जनमत नै हो।’
कांग्रेसमा विभिन्न पार्टीबाट नेता तथा कार्यकर्ताहरू प्रवेश गर्ने लहर चलेको दाबी गर्दै उनले यसले पार्टीलाई बहुमतको दिशामा पुर्याएको बताए। निर्वाचनपछि बन्ने जनमतको सरकारले नै देशका वर्तमान समस्याहरू समाधान गर्ने उनको भनाइ थियो।

























