रवि आउँदा आफ्नै क्षेत्रको सभामा बालेन अनुपस्थित

Share this
711shares
मुलुकी खबर
मुलुकी खबर
clock२०८२ फागुन १२, मंगलबार १४:३४

दमक । राष्ट्रिय स्वतन्त्र पार्टी (रास्वपा) का सभापति रवि लामिछाने झापा क्षेत्र नम्बर ५ को दमकमा आयोजित चुनावी सभामा सहभागी हुँदा सोही क्षेत्रका उम्मेदवार एवं पार्टीका वरिष्ठ नेता बालेन्द्र शाह (बालेन) भने अनुपस्थित भएका छन्। आफ्नै निर्वाचन क्षेत्रमा सभापति आउँदा पनि बालेन उपस्थित नभएपछि रास्वपाभित्रको आन्तरिक समन्वयलाई लिएर विभिन्न टिकाटिप्पणी सुरु भएको छ।

मंगलबार बिहान झापा ओर्लिएका लामिछानेले चन्द्रगढीदेखि बिर्तामोड र दमकसम्मका आधा दर्जन कार्यक्रमलाई सम्बोधन गरेका थिए। पार्टीले वरिष्ठ नेताकै क्षेत्रमा सभापतिको विशेष सम्बोधन भनेर कार्यक्रम प्रचार गरे पनि बालेन भने अघिल्लो दिन नै इटहरी पुगेका थिए। बालेन इटहरी गएको विषयमा क्षेत्रीय समितिलाई समेत जानकारी नहुँदा कार्यकर्ताहरूमा अन्योल देखिएको थियो।

रास्वपा झापा-५ का नेताहरूका अनुसार वरिष्ठ नेता शाहको चुनावी कार्यक्रम उनको आफ्नै सचिवालयले तय गर्ने गर्दछ, जसमा स्थानीय पार्टी कमिटीको खासै भूमिका रहँदैन। क्षेत्रीय सभापति भेषराज भट्टराईले सचिवालयबाट प्राप्त कार्यतालिका अनुसार मात्रै पार्टी परिचालन हुने गरेको स्वीकार गरे।

रोचक पक्ष त के छ भने, झापा-५ मा प्रयोग गरिएका चुनावी पोस्टर र प्रचार सामग्रीमा सभापति रवि लामिछानेको तस्बिर समेत गायब छ। प्रचार सामग्रीमा उम्मेदवार बालेनको मात्रै फोटो राखिएको छ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.