
काठमाडौं । निर्वाचन आयोगले प्रतिनिधि सभा सदस्य निर्वाचन २०८२ सफलतापूर्वक सम्पन्न भएको उपलक्ष्यमा बुधबार कान्तिपथस्थित आफ्नै कार्यालयमा विशेष चियापान तथा जलपान समारोहको आयोजना गरेको छ । मुलुकको लोकतन्त्रलाई सुदृढ बनाउने महान् उत्सवका रूपमा रहेको निर्वाचन सम्पन्न भएपछि आयोगले राज्यका प्रमुख अङ्गका प्रमुखहरूलाई एकै ठाउँमा निम्त्याएको हो ।
समारोहमा प्रमुख अतिथिका रूपमा राष्ट्रपति रामचन्द्र पौडेल सहभागी भएका थिए । कार्यक्रममा उपराष्ट्रपति रामसहाय प्रसाद यादव, प्रधानमन्त्री सुशीला कार्की, राष्ट्रिय सभाका अध्यक्ष नारायण प्रसाद दाहाल र प्रधानन्यायाधीश प्रकाशमान सिंह राउतको पनि विशेष उपस्थिति रहेको थियो । राज्यका यी शीर्ष व्यक्तित्वका साथै प्रतिनिधि सभाका ज्येष्ठ सदस्य अर्जुननरसिंह केसी लगायत अन्य उच्च पदस्थ अधिकारीहरूले कार्यक्रममा सहभागी भई निर्वाचनको सफल समापनमा खुसी साटासाट गरेका थिए ।
आयोगका पदाधिकारीहरूले निर्वाचन सम्पन्न गराउन सहयोग गर्ने सबै पक्षप्रति आभार प्रकट गर्दै जलपान समारोहलाई एक उत्सवका रूपमा मनाएका थिए । यस अवसरमा निर्वाचनले मुलुकको लोकतान्त्रिक प्रणालीलाई थप मजबुत बनाएको चर्चा गरिएको थियो ।

























