
काठमाडौं । चिनियाँ प्रधानमन्त्री ली छियाङले नेपालका नवनियुक्त प्रधानमन्त्री बालेन्द्र (बालेन) शाहलाई बधाई सन्देश पठाएका छन्। शनिबार पठाएको बधाई सन्देशमार्फत चिनियाँ प्रधानमन्त्री लीले नेपालको नयाँ सरकारलाई चीनको पूर्ण समर्थन रहने प्रतिबद्धता जनाएका हुन्।
बधाई सन्देशमा प्रधानमन्त्री लीले चीन र नेपाल पहाड तथा नदीले जोडिएका परम्परागत छिमेकी राष्ट्र भएको उल्लेख गरेका छन्। कूटनीतिक सम्बन्ध स्थापना भएको ७१ वर्षमा दुवै देशले शान्तिपूर्ण सहअस्तित्वका पाँच सिद्धान्त (पञ्चशील) द्वारा निर्देशित भएर द्विपक्षीय सम्बन्धलाई मजबुत बनाएको कुरामा उनले जोड दिएका छन्।
प्रधानमन्त्री लीले नेपालको स्वतन्त्रता, सार्वभौमिकता र क्षेत्रीय अखण्डताको रक्षाका लागि चीनको निरन्तर साथ रहने बताएका छन्। यसका साथै बेल्ट एन्ड रोड इनिसिएटिभ (बीआरआई) लाई संयुक्त रूपमा अगाडि बढाउन र विभिन्न क्षेत्रमा उच्च स्तरको सहयोग सुदृढ गर्न आफू प्रधानमन्त्री शाहसँग नजिक रहेर काम गर्न तयार रहेको सन्देशमा उल्लेख छ।
काठमाडौँस्थित चिनियाँ राजदूतावासले सामाजिक सञ्जालमार्फत सार्वजनिक गरेको जानकारी अनुसार विकास र समृद्धिका लागि चीन–नेपाल मैत्रीपूर्ण रणनीतिक सहकारी साझेदारीलाई थप उचाइमा पुर्याउन चीन प्रतिबद्ध रहेको बताइएको छ।

























