गृहमन्त्री सुधन गुरुङले सोफामा सुतेको फोटोको रहस्य के हो ?

Share this
712shares
मुलुकी खबर
मुलुकी खबर
clock२०८२ चैत २०, शुक्रबार १०:४२

काठमाडौं । गृहमन्त्री सुधन गुरुङले शुक्रबार बिहान सामाजिक सञ्जाल फेसबुकमा सार्वजनिक गरेको एउटा फोटोले राजनीतिक वृत्त र सामाजिक सञ्जाल दुवैतर्फको ध्यान तानेको छ ।

कार्यालयभित्रको जस्तो देखिने सोफामा सिरक ओढेर सुतेको फोटो उनले पोस्ट गरेपछि त्यसलाई लिएर विभिन्न कोणबाट टिप्पणी सुरु भएको छ । फोटोसँगै गृहमन्त्री गुरुङले लेखेको सन्देशले पनि थप चर्चा बटुलेको छ ।

उनले आफ्नो पोस्टमा लेखेका छन्, ‘निर्माताभन्दा ठूलो निर्माण हुँदैन, जनताभन्दा माथि सरकार हुँदैन ।’ छोटो तर अर्थपूर्ण मानिएको उक्त भनाइलाई कतिपयले सत्ता र सरकारको भूमिका बारेको संकेतका रूपमा व्याख्या गरेका छन् भने कतिपयले यसलाई गृहमन्त्रीको व्यक्तिगत सोच र राजनीतिक सन्देशका रूपमा हेरेका छन् ।

सामाजिक सञ्जालमा सार्वजनिक भएको उक्त तस्बिरमा उनी कार्यालयभित्रकै सोफामा विश्राम गरिरहेजस्तो देखिन्छ । फोटोले गृहमन्त्रीको कार्यशैली, व्यस्तता र पछिल्ला दिनका गतिविधिका बारेमा पनि बहस सिर्जना गरेको छ ।

गृहमन्त्री बनेलगत्तै गुरुङ प्रशासनिक र सुरक्षा निकायका गतिविधिमा सक्रिय देखिएका छन् । जेनजी आन्दोलन दमनसम्बन्धी आरोपसँग जोडिएका घटनाहरूको अनुसन्धान अघि बढाउन तथा कारबाही सिफारिस भएका पूर्वपदाधिकारीहरूलाई नियन्त्रणमा लिन उनले निर्देशन दिएको विषय पनि पछिल्ला दिनमा चर्चामा छन् ।

उनकै दबाबमा जेनजी आन्दोलनमा दमन भएको आरोप लागेका तत्कालीन प्रधानमन्त्री केपी शर्मा ओली र तत्कालीन गृहमन्त्री रमेश लेखकलाई पक्राउ गरिएको थियो । प्रहरी कार्यालयहरूको अवलोकन, विवादित व्यापारीहरूमाथिको निगरानी तथा बिचौलिया नियन्त्रणसम्बन्धी निर्देशनजस्ता गतिविधिले पनि गृहमन्त्रीको कार्यशैलीलाई चर्चामा ल्याएको छ ।

यही पृष्ठभूमिमा सार्वजनिक भएको सोफामा सुतेको तस्बिरले गृहमन्त्रीको व्यस्त कार्यतालिका, मानसिक थकान वा प्रतीकात्मक सन्देश के हो भन्नेबारे सार्वजनिक चासो बढाएको देखिन्छ । केहीले यसलाई सामान्य विश्रामको क्षणका रूपमा हेरेका छन् भने केहीले ‘सरकार सुतिरहेको मात्रै छैन’ भनेर नेतृत्व तहबाट दिइएको सन्देशको रूपमा व्याख्या गरिरहेका छन् ।

हालसम्म गृहमन्त्रीको तर्फबाट उक्त फोटोका बारेमा थप स्पष्ट व्याख्या सार्वजनिक गरिएको छैन । तर, उनको पोस्ट र त्यससँग जोडिएको सन्देशले ‘सरकार जनताभन्दा माथि हुँदैन भन्ने राजनीतिक बहसलाई पुनः सतहमा ल्याएको छ ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.