उजुरी दिने समय वैशाख मसान्तसम्म

काठमाडौं । नेपाली कांग्रेसले प्रतिनिधिसभा सदस्य निर्वाचन २०८२ का क्रममा पार्टी अनुशासन उल्लंघन गर्ने आफ्ना सदस्यहरूविरुद्ध उजुरी दिने समय पुनः थप गरेको छ । अब यस्तो उजुरी २०८३ साल वैशाख मसान्तसम्म बुझाउन सकिनेछ ।

पार्टीको केन्द्रीय अनुशासन समितिको बैठकले यसअघिको समयसीमा अपर्याप्त भएको निष्कर्ष निकाल्दै उजुरी दर्ताको अवधि थप गर्ने निर्णय गरेको हो । समितिले स्पष्ट रूपमा वैशाख मसान्तपछि प्राप्त हुने उजुरीमाथि कुनै पनि प्रकारको कारबाही नगर्ने निर्णयसमेत गरेको छ ।

Advertisement

यसअघि अनुशासन समितिले २०८२ साल चैत मसान्तभित्रै उजुरी पेस गर्न निर्देशन दिएको थियो । चैत १८ गते बसेको बैठकले तोकेको उक्त समयसीमा भित्र धेरै उजुरीहरू प्राप्त भए पनि विभिन्न कारणले केही घटनाहरूमा सम्बन्धित पक्षले उजुरी दर्ता गर्न नसकेको गुनासो आएपछि अवधि थपिएको बताइएको छ ।

पार्टीभित्र आन्तरिक अनुशासन कायम राख्न तथा निर्वाचनका क्रममा भएका गतिविधिहरूको समुचित मूल्यांकन गर्न उजुरी प्रक्रियालाई महत्त्वपूर्ण मानिएको छ । फागुन २१ गते सम्पन्न प्रतिनिधिसभा सदस्य निर्वाचनका क्रममा केही स्थानमा पार्टीका आधिकारिक उम्मेदवारविरुद्ध काम गरेको, अन्तरघात गरेको वा संगठनात्मक निर्णयविपरीत गतिविधि गरेको आरोप लागेका थिए ।

यस्ता घटनामाथि छानबिन गरी आवश्यक कारबाही प्रक्रिया अघि बढाउन अनुशासन समितिले उजुरी माग्दै आएको हो । पछिल्लो निर्णयअनुसार अब वैशाख मसान्तसम्म पार्टीका कुनै पनि तहका सदस्य, नेता वा सरोकारवालाले लिखित रूपमा उजुरी दर्ता गर्न सक्नेछन् । तर, तोकिएको समयसीमा नाघेपछि प्राप्त हुने उजुरीलाई भने पूर्ण रूपमा अस्वीकार गरिने स्पष्ट गरिएको छ ।

अनुशासन समितिको निर्णयमा भनिएको छ, ‘प्रतिनिधिसभा सदस्य निर्वाचन २०८२ का सन्दर्भमा पार्टीका सदस्यहरूले अनुशासन उल्लंघन गरेको भए सोसम्बन्धी उजुरी २०८२ चैत मसान्तभित्र केन्द्रीय अनुशासन समितिमा पठाउन निर्देशन गरिएकोमा अब उक्त समयावधि २०८३ वैशाख मसान्तसम्मका लागि थप गरिएको छ । त्यसपछि प्राप्त हुने उजुरीमाथि कुनै कारबाही गरिने छैन ।’

पार्टीभित्रको अनुशासन प्रणालीलाई कडाइका साथ कार्यान्वयन गर्ने उद्देश्यले यस्तो निर्णय गरिएको नेताहरूले बताएका छन् । निर्वाचनमा देखिएको अन्तरघात, असहयोग र संगठनविरुद्धका गतिविधिलाई नियन्त्रण गर्न अनुशासन समितिले सक्रियता बढाएको सन्देश यस निर्णयले दिएको छ ।