एकताबद्ध हुन ओलीको आह्वान

मुलुकी खबर

२०८३ वैशाख ९, बुधबार १७:१३

काठमाडौं । पूर्वप्रधानमन्त्री एवं नेकपा (एमाले)का अध्यक्ष केपी शर्माले ओलीले एकताबद्ध हुन आह्वान गरेका छन् ।

नेपालको कम्युनिष्ट आन्दोलनले ७७ वर्ष पूरा भएको अवसरमा ओलीले उक्त आह्वान गरेका हुन् । अस्वस्थताका कारण कार्यक्रममा उपस्थित हुन नसकेका ओलीको सन्देश पार्टीका उपाध्यक्ष रामबहादुर थापा ‘बादल’ले पढेर सुनाएका थिए ।

सन्देशमा ओलीले एमालेले निरंकुशताको अन्त्य र गणतन्त्र स्थापनामा महत्वपूर्ण भूमिका खेलेको स्मरण गराउँदै अहिलेको चुनौती पार गर्न पार्टी एकताबद्ध हुनुपर्ने बताएका छन् । ‘नेकपा एमाले अनेकौं प्रतिकूलता पार गर्दै यहाँसम्म आइपुगेको हो । अब पनि एक भएर चुनौती सामना गर्नुपर्छ,’ सन्देशमा उल्लेख छ ।

यस्तै, कार्यक्रममा बोल्दै नेता विष्णु पौडेलले पछिल्लो चुनावमा पार्टीले भोगेको पराजयलाई ‘ठूलो धक्का’को रूपमा स्वीकार गरे । उनले यो सामान्य नभई गम्भीर समीक्षा गर्नुपर्ने विषय भएको बताए । ‘धक्काबाट शिक्षा लिएर अघि बढ्नुपर्छ,’ उनले भने ।

पौडेलले २०७२ देखि २०८२ सम्मको अवधिमा प्राप्त अवसरहरूलाई पूर्ण रूपमा उपयोग गर्न नसकिएको स्वीकार गर्दै अब आन्तरिक र बाह्य कारणहरूको समीक्षा गर्नुपर्नेमा जोड दिए । उनले जनताबाट आएको आलोचनालाई गम्भीरतापूर्वक लिनुपर्ने पनि बताए ।

अब पार्टीले आचरण र कार्यनीतिमा परिवर्तन नगरी अघि बढ्न नसक्ने उनको भनाइ छ । पौडेलले कार्यकर्तालाई निराश नहुन आग्रह गर्दै एकता कायम राख्दै रूपान्तरणको बाटो समात्नुपर्ने बताए ।

तपाइको प्रतिक्रिया