विराटनगरमा ८ जना पत्रकार पुरस्कृत

मुलुकी खबर

२०८३ वैशाख २४, बिहीबार १४:४९

विराटनगर । राष्ट्रिय पत्रकारिता दिवसको अवसरमा कोशी प्रदेश सरकारले पत्रकारिताको क्षेत्रमा योगदान पुर्‍याएका आठ जना पत्रकारलाई बिहीबार सम्मान गर्दै पुरस्कार प्रदान गरेको छ ।

विराटनगरमा आयोजित विशेष समारोहमा कोशी प्रदेशको आन्तरिक मामिला तथा कानुन मन्त्रालयले विभिन्न माध्यमबाट समाजमा सकारात्मक प्रभाव पार्ने पत्रकारहरूको योगदानको कदर गर्दै उक्त सम्मान प्रदान गरेको हो । कार्यक्रममा कोशी प्रदेशका मुख्यमन्त्री हिक्मतकुमार कार्कीले नगद १ लाख रुपैयाँसहित पुरस्कार प्रदान गरेका हुन् ।

पत्रकारितामार्फत सामाजिक सरोकारका विषयहरू उजागर गर्दै जनतासम्म सूचना पुर्‍याउने भूमिकामा उल्लेखनीय योगदान गरेका पत्रकारहरुलाई सम्मान गरिएको आन्तरिक मामिला तथा कानुन मन्त्री इन्द्रमणि पराजुलीले बताए । पत्रकारहरूलाई विभिन्न विधा र योगदानका आधारमा सम्मान गरिएको छ ।

सम्मानित हुने पत्रकारहरुमा गोपाल दाहाल, रेजिना गौतम, ठालुप्रसाद (विवेक) गौतम, सिद्धराज राई, मनोज श्रेष्ठ, शेखर रेग्मी, श्यामसुन्दर सुतियार र सन्तोष रुचाल रहेका छन् । उनीहरूलाई नगद पुरस्कारसहित प्रशंसा पत्र प्रदान गरिएको छ ।

कार्यक्रमका वक्ताहरुले पत्रकारिता लोकतन्त्रको महत्वपूर्ण आधार भएको उल्लेख गर्दै सत्य, निष्पक्ष र जिम्मेवार पत्रकारिताले समाजलाई सही दिशातर्फ लैजान मद्दत गर्ने धारणा व्यक्त गरेका छन् । साथै, प्रदेश सरकारले आगामी दिनमा पनि पत्रकारहरूको क्षमता विकास र स्वतन्त्र पत्रकारितालाई प्रोत्साहन गर्ने प्रतिबद्धता जनाएको छ ।

राष्ट्रिय पत्रकारिता दिवसको अवसरमा गरिएको सम्मान कार्यक्रमले कोशी प्रदेशमा कार्यरत पत्रकारहरूलाई थप जिम्मेवार र प्रेरित बनाएको छ । सम्माहन समारोहमा प्रदेश सरकारका मन्त्री, कर्मचारी, सञ्चारकर्मी तथा सरोकारवालाको उपस्थिति रहेको थियो ।