जेठभित्र एकता प्रक्रिया सक्ने नेकपाको निर्णय, मंसिरमा महाधिवेशन

काठमाडौं। नेपाली कम्युनिस्ट पार्टी (नेकपा) ले आगामी जेठ मसान्तसम्म एकता प्रक्रियामा जोडिएका सबै घटकसँगको समायोजन टुङ्ग्याउने भएको छ। पार्टी एकता र संगठन व्यवस्थापनको काम सकिए लगत्तै संगठन सुदृढीकरण र शुद्धीकरण अभियान सञ्चालन गर्ने लक्ष्य नेकपाले लिएको छ।

पार्टी संयोजक प्रचण्ड र सहसंयोजक माधव कुमार नेपालले शनिबार हस्ताक्षर गरेको अन्तरपार्टी निर्देशन (अपानी)–३ मा आगामी मंसिर दोस्रो हप्ता एकता महाधिवेशन सम्पन्न गर्ने उल्लेख छ। ‘आजको परिस्थितिमा जनतासँग घनिष्ट रूपमा जोडिएको क्रान्तिकारी पार्टी निर्माणका लागि मंसिरमा महाधिवेशन गरिने छ,’ अपानीमा भनिएको छ।

Advertisement

नेकपाले वडादेखि केन्द्रसम्मका सबै समितिहरूलाई समावेशी बनाउने नीति लिएको छ। विशेषगरी सबै तहका समितिमा पाका, अनुभवी र युवाहरूको उचित सन्तुलन मिलाइने र युवाहरूको प्रतिनिधित्व ५० प्रतिशतसम्म पुर्याउन जोड दिइने जनाएको छ। नेता तथा कार्यकर्ताको कार्यशैली, जीवनशैली र आचरण सुधारका लागि समेत ठोस पहल अगाडि बढाइने बताइएको छ।

गत चैत १९ गतेदेखि सुरु भएको नेकपा संयोजन समितिको बैठक वैशाख १५ गते सम्पन्न भएको थियो। सोही बैठकका निर्णयहरू समेटेर अपानी तयार पारिएको हो। नेतृत्वले हस्ताक्षर गरिसकेको भए पनि यो परिपत्र पार्टीका तल्लो कमिटीहरूमा पुग्न भने बाँकी रहेको नेताहरूले बताएका छन्। नेकपाले सिङ्गो कम्युनिस्ट आन्दोलनलाई पुनः एकीकृत गर्दै बलियो शक्ति निर्माण गर्ने संकल्प समेत गरेको छ।