जबरजस्ती करणी मुद्दामा ७ वर्ष कैद र ३ लाख क्षतिपूर्तिको फैसला

जनकपुरधाम। सप्तरीमा विवाहको प्रलोभन दिई पटक–पटक करणी गरेको घटनामा एक युवकलाई सात वर्ष कैद र ३ लाख रुपैयाँ क्षतिपूर्ति तिराउन अदालतले आदेश दिएको छ।

सप्तरी जिल्ला अदालतका न्यायाधीश महेन्द्रबहादुर थापा क्षेत्रीको इजलासले महादेवा गाउँपालिका- ४ डाढा टोल बस्ने २१ वर्षीय अजय कुमार साहलाई उक्त सजाय सुनाएको हो। गएको फागुनमा फैसला सुनाइएको भए पनि फैसलाको पूर्णपाठ भने हालैमात्र सार्वजनिक भएको छ।

Advertisement

२०८२ वैशाख ११ गते दर्ता भएको मुद्दामा सातौँ पेशीमा गत फागुन १७ गते अदालतले फैसला सुनाएको थियो। साहले विवाहको प्रलोभन देखाएर २०८१ चैत ८ गते साँझको समयमा पीडितलाई आफ्नो घरमा बोलाएर रातिको समयमा इच्छा विपरीत पटक–पटक जबरजस्ती करणी गरेको भन्दै पीडितका अभिभावकले जाहेरी दिएका थिए।

युवकले पीडित र आफूबीच टिकटकको माध्यमबाट चिनजान भएको र दुवै जनाबीच प्रेम भई विवाह गर्नेसम्म सहमति भएको बयान दिएका थिए। उनले विवाह गर्छु भनि पीडितकै सहमतिमा करणी गरेको दाबी गरेका थिए। तर पीडितले आफूलाई फोन गरेर बोलाएर जबरजस्ती करणी गरेको र आफू रोई कराई गर्दा साहले विवाह गर्ने भन्दै फकाई सोही राति सोही ठाउँमा छोडेर फरार भएको बताएकी छन्।

अदालतमा भने साहले जाहेरवालालाई नचिनेको तर पीडित भनिएकी युवतीलाई टिकटकमा साथी भएकाले चिनेको भन्दै आफूले जबरजस्ती करणी नगरेको भन्दै इनकारी बयान दिएका थिए। उनले अदालतमा इनकारी बयान गरेपनि अनुसन्धानको क्रममा बयान गर्दा पटक-पटक विवाह गर्छु भनी पीडितकै सहमतिमा करणी गरेको स्वीकार गरेका थिए। पीडितको स्वास्थ्य परीक्षण प्रतिवेदन र परीक्षण गर्ने विशेषज्ञ चिकित्सकको बकपत्रले समेत जबरजस्ती करणी भएको पुष्टि भएको अदालतको ठहर छ।