१० वर्ष कैद तोकिएका अभियुक्त भद्रपुरबाट पक्राउ

मुलुकी खबर

२०८३ जेष्ठ ८, शुक्रबार १७:५४

झापा । लागुऔषध मुद्दामा अदालतबाट कैद तथा जरिबानाको सजाय सुनाइए पनि लामो समयदेखि फरार रहेका अभियुक्तलाई प्रहरीले झापाको भद्रपुरबाट पक्राउ गरेको छ ।

भद्रपुर नगरपालिका–८ का ४१ वर्षीय गुल्लु भनिने मोहम्मद असर्फ शेख पक्राउ परेका हुन् । गोप्य सूचनाको आधारमा भद्रपुर–८ को एसपी मोडबाट पक्राउ गरिएको झापा प्रहरीका सूचना अधिकारी डीएसपी, खगेन्द्रबहादुर खड्काले बताए ।

इन्स्पेक्टर विजय चौहानको नेतृत्वमा खटिएको टोलीले शेखलाई नियन्त्रणमा लिएको हो । शेखलाई जिल्ला अदालत झापाले २०८१ असोज ११ गते लागुऔषध मुद्दामा १० वर्ष कैद सजाय र ७५ हजार रुपैयाँ जरिबानाको फैसला गरेको थियो ।

तर, अदालतले दोषी ठहर गरेर कैद तथा जरिबानाको फैसला गरे पनि उनी सजाय भुक्तान नगरिकन फरार भइरहेका थिए । पक्राउपछि शेखलाई जिल्ला अदालत झापामा उपस्थित गराइएको प्रहरीले जनाएको छ । अदालतले उनलाई सजाय भुक्तानका लागि जिल्ला कारागार झापा चलान गरेको छ ।

तपाइको प्रतिक्रिया