ओलीमाथि राजीनामाको दबाब

काठमाडौं । नेकपा (एमाले)भित्र अध्यक्ष केपी शर्मा ओलीको नेतृत्वलाई लिएर असन्तुष्टि थप तीव्र बनेको छ । उनमाथि पार्टीभित्रैबाट राजीनामाको दबाब बढेको हो ।

शुक्रबार बसेको सचिवालय बैठकमा नेताहरुले ओलीलाई राजीनामा दिएर मार्ग प्रशस्त गर्न सुझाव दिएका छन् । अध्यक्ष ओलीको निवास गुण्डुमा बसेको बैठकमा नेतृत्व, पार्टीको पछिल्लो अवस्था, निर्वाचनमा भएको पराजय र पार्टी पुनर्गठन अभियानलाई लिएर नेताहरूबीच तीव्र विवाद देखिएको हो ।

Advertisement

बैठकमा विशेषगरी अध्यक्ष ओली र उपाध्यक्ष पृथ्वीसुब्बा गुरुङबीच चर्काचर्की भएपछि केही समय बैठकको माहोल तनावपूर्ण बनेको थियो । सचिवालयका नेताहरूका अनुसार अध्यक्ष ओलीले पार्टीविरुद्ध पुनर्गठन अभियान चलाइएको भन्दै असन्तुष्टि व्यक्त गरेपछि उपाध्यक्ष गुरुङले प्रतिवाद गरेका थिए ।

बैठकमा उपस्थित एक नेताका अनुसार अध्यक्ष ओलीले पार्टी नेतृत्व संकटमा परेको बेला नेतृत्वको प्रतिरक्षा गर्नुपर्नेमा केही नेताहरू पुनर्गठनको अभियानमा लागेको भन्दै आक्रोश व्यक्त गरेका थिए । त्यसपछि उपाध्यक्ष गुरुङले प्रत्यक्ष रूपमा अध्यक्ष ओलीलाई प्रश्न गर्दै एमाले कुनै व्यक्तिको निजी कम्पनी नभएको बताएका थिए ।

‘एमाले तपाईंले मात्रै बनाएको पार्टी हो र ? एमाले तपाईंको प्राइभेट कम्पनी हो ? यो पार्टीमा हाम्रो योगदान छैन ? अरू नेताहरूको भूमिका छैन ? कसलाई धम्की दिन खोजिएको हो ?’ भन्दै गुरुङले प्रतिवाद गरेको स्रोतको दाबी छ । ओली र गुरुङबीच केही समय भनाभन चलेपछि बैठकमा असहज अवस्था सिर्जना भएको बताइएको छ ।

सचिवालयका केही सदस्यहरूका अनुसार एमालेको उच्च तहको बैठकमा यस प्रकारको खुला विवाद यसअघि विरलै देखिएको थियो । शुक्रबारको बैठकमा पाँच उपाध्यक्षमध्ये चार जनाले अध्यक्ष ओलीलाई नेतृत्वबाट मार्ग प्रशस्त गर्न सुझाव दिएका थिए । उपाध्यक्ष विष्णु पौडेल, पृथ्वीसुब्बा गुरुङ, गोकर्ण विष्ट र रघुजी पन्तले पार्टीको कमजोर अवस्थाको जिम्मेवारी नेतृत्वले लिनुपर्ने धारणा राखेका थिए ।

यद्यपि, उपाध्यक्ष रामबहादुर थापा ‘बादल’ भने अध्यक्ष ओलीको पक्षमा दृढ रूपमा उभिएका थिए । उनले पार्टीमाथि देशी–विदेशी शक्तिको घेराबन्दी भएको र त्यसकै कारण पार्टीले निर्वाचनमा पराजय भोग्नुपरेको विश्लेषण प्रस्तुत गरेका थिए ।

बैठकमा बोल्ने क्रममा बादलले एमालेमाथि चौतर्फी हमला भइरहेको दाबी गर्दै राष्ट्रिय तथा अन्तर्राष्ट्रिय शक्तिहरू पार्टी कमजोर बनाउन सक्रिय रहेको बताएका थिए । अध्यक्ष ओलीले पनि बादलको भनाइलाई समर्थन गर्दै त्यसलाई पार्टीको आधिकारिक बुझाइका रूपमा प्रस्तुत गर्न खोजेको स्रोतको भनाइ छ ।

तर, उपाध्यक्ष विष्णु पौडेल र पृथ्वीसुब्बा गुरुङले त्यसको प्रतिवाद गर्दै निर्वाचन हारको सम्पूर्ण कारण बाह्य शक्तिलाई मात्रै देखाउन नमिल्ने बताएका थिए । उनीहरूले पार्टीभित्रको नेतृत्व शैली, संगठनात्मक कमजोरी र कार्यकर्ता पंक्तिमा बढेको निराशा पनि हारको मुख्य कारण भएको धारणा राखेका थिए ।

त्यसपछि बैठकको माहोल झन् तनावपूर्ण बनेको थियो । एक नेताका अनुसार नेताहरूको अनुहारमा रिस स्पष्ट देखिन्थ्यो भने बोल्ने शैली पनि असामान्य रूपमा कठोर बनेको थियो । ‘एक जना नेता बोल्दा अर्को नेताले बीचमै प्रतिक्रिया जनाउने अवस्था बन्यो । केही समय त बैठक नै सन्नाटाजस्तो भयो,’ एक सचिवालय सदस्यले भने ।

एमालेभित्र पछिल्लो समय अध्यक्ष ओलीको राजीनामाको माग खुलेर उठ्न थालेको छ । गत फागुन २१ गते सम्पन्न निर्वाचनमा एमाले प्रत्यक्षतर्फ ९ र समानुपातिकतर्फ १६ सिट जित्दै जम्मा २५ सिटमा सीमित भएपछि नेतृत्वको कार्यशैलीमाथि प्रश्न उठ्दै आएको छ ।

पार्टीभित्रका असन्तुष्ट समूहहरूले पराजयको नैतिक जिम्मेवारी अध्यक्ष ओलीले लिनुपर्ने आवाज उठाउँदै आएका छन् । केही नेता कार्यकर्ताले नेतृत्व परिवर्तन र पार्टी पुनर्गठनको माग गर्दै हस्ताक्षर अभियानसमेत चलाइसकेका छन् ।

सचिवालय बैठकमा पनि यही असन्तुष्टि सतहमै देखिएको नेताहरूको भनाइ छ । चार उपाध्यक्षले पार्टीलाई संकटबाट जोगाउन नेतृत्व परिवर्तन आवश्यक भएको धारणा राखेपछि ओली पक्ष असन्तुष्ट बनेको थियो ।

स्रोतका अनुसार अध्यक्ष ओलीले आफूविरुद्ध पार्टीभित्र मोर्चाबन्दी भइरहेको संकेत बुझेपछि आन्तरिक समीकरण व्यवस्थापनमा सक्रियता बढाएका छन् । विगतमा आफू निकट मानिएका केही नेताहरू समेत अहिले आलोचनात्मक देखिन थालेपछि ओलीले नयाँ राजनीतिक सन्तुलन खोज्ने प्रयास गरिरहेका छन् ।

कतिपय नेताहरूले पूर्वराष्ट्रपति विद्या भण्डारीको पार्टी सदस्यता खुला गरिनुलाई पनि यही रणनीतिसँग जोडेर हेर्ने गरेका छन् । ओलीमाथि बढ्दो दबाबलाई मत्थर पार्न र पार्टीभित्र आफ्नो शक्ति सन्तुलन जोगाउन यस्तो कदम चालिएको विश्लेषण एमालेभित्रै हुन थालेको छ ।

एमालेभित्र नेतृत्व परिवर्तनको बहस अब आन्तरिक असन्तुष्टिमा मात्रै सीमित नरही सचिवालय तहसम्म पुगेको शुक्रबारको बैठकबाट प्रष्ट हुन्छ । अध्यक्ष ओली तत्काल नेतृत्व छाड्ने मनस्थितिमा नरहेको देखिए पनि पार्टीभित्र उनको कार्यशैली र नेतृत्व क्षमतामाथिको प्रश्न भने झन् तीव्र बन्दै गएको छ ।