सरकारका प्रवक्ताको ‘झुक्याउने अभिव्यक्ति’ : विरोधाभासबीच रवि लामिछाने दिल्ली जाने तयारीमा

काठमाडौं । सरकारका प्रवक्ता सस्मित पोखरेलले राष्ट्रिय स्वतन्त्र पार्टी (रास्वाप)का सभापति रवि लामिछानेको भारत भ्रमणसँग प्रधानमन्त्री बालेन्द्र शाह (बालेन)को कुनै सम्बन्ध नरहेको दाबी गरेका छन् ।

तर, पछिल्ला राजनीतिक घटनाक्रम, भारततर्फबाट भएका कूटनीतिक पहल तथा लामिछानेको तय भएको भ्रमणका विवरणले सरकारको आधिकारिक अभिव्यक्तिमाथि नै प्रश्न उठाएको छ । सोमबार मन्त्रिपरिषद् बैठकपछि सञ्चारकर्मीसँग कुरा गर्दै सरकारका प्रवक्ता पोखरेलले प्रधानमन्त्री शाह अहिले कुनै पनि विदेश भ्रमणको तयारीमा नरहेको बताए ।

Advertisement

‘सभापतिज्यू आफ्नै ढंगले जाँदै हुनुहुन्छ । प्रधानमन्त्रीज्यूको त्यससँग केही सम्बन्ध छैन,’ उनले भने । उनले सरकारको प्राथमिकता अहिले पहिलो सय दिनको काममा केन्द्रित रहेकाले भ्रमण प्राथमिकतामा नरहेको पनि जिकिर गरे ।

तर, राजनीतिक तथा कूटनीतिक वृत्तमा भने भारतले प्रधानमन्त्री शाहको भ्रमण अनिश्चित बनेपछि रवि लामिछानेलाई विशेष महत्वका साथ निम्त्याएको चर्चा चुलिएको छ । रास्वपा स्रोतका अनुसार लामिछाने भारतीय विदेश मन्त्रालय तथा भारतीय जनता पार्टीको निमन्त्रणामा भारत भ्रमणमा जाने तयारीमा छन् ।

भ्रमणका क्रममा उनले भारतीय प्रधानमन्त्री नरेन्द्र मोदीसँग भेट गर्ने कार्यक्रम तय भएको दाबी गरिएको छ । यद्यपि, यसको औपचारिक पुष्टि भने अझै सार्वजनिक गरिएको छैन । लामिछानेले भारतीय विदेशमन्त्री एस जयशंकर, भारतीय विदेश सचिव विक्रम मिश्रीलगायत उच्च अधिकारीसँग पनि भेट गर्ने कार्यक्रम रहेको बताइएको छ ।

भारतीय जनता पार्टीका अध्यक्ष नितिन नवीनसँग पनि भेटघाटको तयारी गरिएको र पार्टी कार्यालयमै स्वागत कार्यक्रम राखिएको स्रोतको भनाइ छ । रास्वपा निकट स्रोतका अनुसार लामिछाने जेठ १८ गते त्रिभुवन अन्तर्राष्ट्रिय विमानस्थलबाट दिल्ली प्रस्थान गर्नेछन् । भारत भ्रमण सकेर जेठ २० गते फर्किने छन् । उनीसँग पत्नी निकिता, स्वकीय सचिव तथा दुई सांसद पनि भ्रमण टोलीमा रहनेछन् ।

सांसदद्वय विपिनकुमार आचार्य र दीपक बोहरा पनि भ्रमणमा सहभागी हुने बताइएको छ । लामिछानेको अयोध्या भ्रमणको कार्यक्रमसमेत तय गरिएको चर्चा छ ।

यसबीच प्रधानमन्त्री शाहको भारत भ्रमण किन रोकियो भन्ने प्रश्न पनि उठिरहेको छ । यसअघि भारतीय विदेश सचिव विक्रम मिश्री नेपाल आएर प्रधानमन्त्री शाहलाई भारत भ्रमणको औपचारिक निमन्त्रणा दिने तयारीमा रहेको चर्चा थियो । तर, प्रधानमन्त्रीसँग भेटको समय नमिलेपछि उनको नेपाल भ्रमण नै स्थगित भएको बताइएको थियो ।

त्यसपछि नेपाल–भारत सम्बन्धमा थप चिसोपन देखिएको विश्लेषण भइरहेको छ । भारत र चीनबीच लिपुलेक हुँदै कैलाश–मानसरोवर यात्रा सञ्चालन गर्ने सहमति सार्वजनिक भएपछि नेपाल सरकारले दुवै देशलाई कूटनीतिक नोट पठाएर असन्तुष्टि जनाएको थियो । नेपालसँग कुनै परामर्श नगरी नेपाली भूमि समेटिएको क्षेत्रमा समझदारी गरिएको भन्दै सरकारले विरोध जनाएको थियो ।

यतिमात्र होइन, परराष्ट्रमन्त्री शिशिर खनालको प्रस्तावित भारत भ्रमणसमेत अन्तिम समयमा स्थगित भएको थियो । यी सबै घटनाक्रमबीच भारतले रवि लामिछानेलाई उच्च प्राथमिकतासहित निमन्त्रणा दिएको समाचार बाहिरिएपछि सरकारको आधिकारिक भनाइ र वास्तविक कूटनीतिक गतिविधिबीच विरोधाभास देखिएको छ ।

राजनीतिक विश्लेषकहरूका अनुसार प्रधानमन्त्री शाहले भारतसँग तुलनात्मक दूरी कायम राख्ने संकेत गरिरहेका बेला भारतले वैकल्पिक राजनीतिक शक्ति र उदाउँदै गरेको नेतृत्वसँग सम्बन्ध सुदृढ गर्न खोजेको सन्देश दिन खोजेको हुनसक्छ । विशेषगरी नेपालमा रास्वपाले पछिल्लो समय हासिल गरेको जनसमर्थनलाई भारतले नजिकबाट हेरिरहेको आकलन गरिएको छ ।

यसअघि प्रधानमन्त्री बनेपछि भारतका प्रधानमन्त्री नरेन्द्र मोदीले बालेन्द्र शाह र रवि लामिछाने दुवैलाई टेलिफोनमार्फत बधाई दिएका थिए । तर, पछिल्लो चरणमा प्रधानमन्त्रीको सम्भावित भारत भ्रमण अनिश्चित बन्नु र त्यसैबीच लामिछानेको उच्चस्तरीय राजनीतिक भेटघाटसहित दिल्ली भ्रमण तय हुनु अर्थपूर्ण घटनाका रूपमा हेरिएको छ ।

यस्तो अवस्थामा सरकारका प्रवक्ता पोखरेलले ‘प्रधानमन्त्रीको भ्रमणसँग यसको कुनै सम्बन्ध छैन’ भनेर दिएको अभिव्यक्तिलाई धेरैले वास्तविकता ढाकछोप गर्ने प्रयासका रूपमा समेत व्याख्या गर्न थालेका छन् । सरकारका प्रवक्ताले झुक्याउने अभिव्यक्ति दिएको चर्चा भइरहेको छ ।